भारतले दक्षिण अफ्रिकाविरुद्धको तीन खेलको टेस्ट सिरिज क्लिनस्विप गरेको छ।
भारतले तेस्रो टेस्टमा दक्षिण अफ्रिकालाई इनिङ्ग्स र २०२ रनले पराजित गर्दै सिरिज ३-० ले जितेको हो।
राँचीमा भएको तेस्रो टेस्टमा फलोअनमा परेको दक्षिण अफ्रिका मंगलबार दोस्रो इनिङमा १३३ रनमै अलआउट भयो। अघिल्लो दिन ८ विकेट गुमाएको दक्षिण अफ्रिकाको अन्तिम २ विकेट भारतका साहबाज नदीमले लिए। मंगलबारको खेल केवल २ ओभरमा मात्र चल्यो।
दोस्रो इनिङमा दक्षिण अफ्रिकाका लागि जर्ज लिन्डले सबैभन्दा बढी २७ रन जोडे। बलिङमा भारतका मोहमद सामीले ३ विकेट लिँदा उमेश यादव र नदीमले २-२ विकेट लिए।
पहिलो इनिङमा दक्षिण अफ्रिका १६२ रनमै अलआउट हुँद फलोअनमा परेको थियो। दक्षिण अफ्रिकाका लागि पहिलो इनिङमा जुबायर हम्जाले सबैभन्दा बढी ६२ रन जोड्दा बलिङमा भारतका उमेश यादवले ३ विकेट लिए। मोहमद सामी, नदीम र जडेजाको नाममा २-२ विकेट रह्यो।
पहिलो इनिङमा भारतले ९ विकेटको क्षतिमा ४९७ रन बनाएर इनिङ समाप्तीको घोषणा गरेको थियो।
भारतका लागि ओपनिङ ब्याट्सम्यान रोहित शर्माले दोहोरो शतक हिर्काए। रोहितले २१२ रनको योगदान दिए।
उनले २५५ बलमा २८ चौका र ६ छक्का हिर्काए। अजिन्का राहाणेले ११५ रनको योगदान दिए। उनले १९२ बलमा १७ चौका र १ छक्का हिर्काए।रवीन्द्र जडेजाले ५१ रनको योगदान दिए।
बलिङमा दक्षिण अफ्रिकाका जर्ज लिन्डले ४ विकेट र कागिसो रबाडाले ३ विकेट लिए।
जारी टेस्ट च्याम्पियनसिपमा भारतको यो लगातार पाँचौ खेलमा जित हो। शीर्ष स्थानमा रहेको भारतले २४० अंक जोडिसकेको छ। २ खेलमा १ जित हात पारेको न्युजिल्यान्ड ६० अंक जोडेर दोस्रो स्थानमा छ।