वुमेन्स च्याम्पियन्स लिग (डब्लुसिएल) टी-२० क्रिकेट प्रतियोगिताको उपाधिका लागि क्याट क्विन काठमाडौं र चितवन राइनोजबीच प्रतिस्पर्धा हुने भएको छ।
काठमाडौंले सोमबार भएको एलिमिनेटरमा विराटनगर टाइटन्सलाई ९ विकेटले हराएर चितवनसँग उपाधि भिडन्त पक्का गरेको हो। चितवन भने समूहका सबै खेल जितेर सिधैं फाइनलमा पुगेको थियो।
टस जितर पहिले ब्याटिङ गरेको विराटनगर १७.३ ओभरमा ६८ रनमै अलआउट भयो।
सात ओभरमा ४४ रन बनाउदा पहिलो विकेट गुमाएको विराटनगरले बाँकी २४ रन बनाउँदा ९ विकेट गुमायो।
विराटनगरका लागि सोनु खड्काले २५ बलमा ६ चौका प्रहार गरेर ३४ रन र ज्योती पाण्डेले १२ रनको योगदान दिए। अन्यले दोहोरो अंकमा रन बटुल्न सकेनन्।
विराटनगरको इनिङ ध्वस्त पार्न काठमाडौंकी कप्तान रुबिना क्षेत्री बेलबासेले ४ विकेट लिइन्।
६९ रनको लक्ष्य काठमाडौंले ९.५ ओभरमा १ विकेटको क्षतिमा पूरा गर्यो।
रोमा थापा पहिलो बलमा आउट भए पनि कप्तान रुबिनाले नटआउट ३४ रन र अप्सरी बेगमले नटआउट २७ रन जोडे। रुबिनाले ३० बलमा ६ चौका र बेगमले २८ बलमा ३ चौका प्रहार गरिन्।
उपाधिका लागि बिहीबार प्रतिस्पर्धा हुनेछ।