अस्ट्रेलियाको बिग ब्यास लिग (बिबिएल) टी–२० क्रिकेट प्रतियोगितामा बुधबार दुई ह्याट्रिक भएका छन्।
मेलवर्न स्टार्सका तीव्र गतिका बलर हरिस रउफ र एडिलेट स्ट्राइकर्सका स्पिनर रासिद खानले बुधबार ह्याट्रिक गरेका हुन्।
दिनको पहिलो खेलमा अफगानिस्तानका बलर रासिदले सिड्नी सिक्सरविरुद्धको खेलमा ह्याट्रिक गरे।
रासिदले ११औं ओभरको पाँचौ बलमा सिड्नीका जेम्स भिन्सलाई २७ रनमा क्याच आउट गराए भने छैटौं बलमा ज्याक इडवार्डलाई एलबिडब्लूको धरापमा पारे।
यस्तै १३औं ओभरको पहिलो बलमा जोर्डन सिल्कलाई बोल्ड गरेपछि रासिदले ह्याट्रिक पूरा गरे।
खेलमा रासिदले ४ ओभरमा ४ विकेट लिए पनि सिड्नीले रासिदको एडिलेटलाई २ विकेटले हरायो।
यता मेलवर्नका पाकिस्तानी बलर हरिसले सिड्नी थन्डरविरुद्धको खेलमा ह्याट्रिक गरेका हुन्।
उनले २० ओभरमा ह्याट्रिक लिए। २०औं ओभरको दोस्रो बलमा म्याथ्यु गिल्कलाई सन्दीप लामिछानेबाट क्याच आउट गराएका हरिसले तेस्रो बलमा कोलुम फर्ग्युसनलाई बोल्ड गरे। चौथो बलमा उनले ड्यानियल साम्सलाई एलबिडब्लूको धारापमा पार्दै ह्याट्रिक पूरा गरे।
उनले खेलमा ४ ओभरमा ३ विकेट लिँदा २३ रन दिए।
यता मेलवर्नमा रहेका नेपालका लेगस्पिनर सन्दीपले भने सिड्नीविरुद्ध विकेट लिन सकेनन्। सन्दीपले चार ओभरमा ३९ रन खर्चिए।
खेलमा पहिले ब्याटिङ गरेको सिड्नीले मेलवर्नलाई १४६ रनको लक्ष्य दिएको छ।
