एसिसी इस्टर्न रिजन टी-२० क्रिकेट प्रतियोगितामा सिंगापुर र हङकङले लगातार दोस्रो जित निकालेका छन्।
सिंगापुरले मंगलबार भएको खेलमा मलेसियालाई १२८ रनको फराकिलो अन्तरले पराजित गर्यो। पहिले ब्याटिङ गरेको सिंगापुरले २० ओभरमा ३ विकेट गुमाएर २३९ रन जोड्यो। उसका लागि टिम डेभिडले ३२ बलमा नटआउट ९२ रन जोडे। उनले ९ चौका र ७ छक्का प्रहार गरे।
२४० रनको लक्ष्य पछ्याएको मलेसिया १५.१ ओभरमा १११ रनमा अलआउट भयो।
अर्को खेलमा हङकङले आयोजक थाइल्यान्डलाई ८ विकेटले हरायो। पहिले ब्याटिङ गरेको थाइल्यान्डले २० ओभरमा ८ विकेटको क्षतिमा ७७ रन जोड्यो। हङकङले २ विकेटको क्षतिमा ७.४ ओभरमा लक्ष्य पूरा गर्यो।
प्रतियोगितामा आयोजक थाइल्यान्ड सुरुवाती तीन खेलमै पराजित भएको छ। सिंगापुर, हङकङ र मलेसियाले २-२ खेलमा जित हात पारेका छन्। तीनै टिमको समान ४-४ अंक छ।
नेपाल सुरुवाती दुवै खेलमा पराजित भएको थियो। नेपाललाई मलेसिया र हङकङले हराएका थिए। अब नेपालले बुधबार थाइल्यान्डसँग खेल्नेछ।
प्रतियोगिताका शीर्ष २ टिम एसिया कप छनोटमा पुग्नेछन्। अब नेपालले बाँकी रहेका दुवै खेल जिते पनि एसिया कप छनोटमा पुग्न पर्याप्त हुनेछैन। अन्य टिमको नतिजामा भर पर्नु पर्ने नेपालको सम्भावना झिनो मात्र बाँकी छ।