नेपाल क्रिकेट संघ (क्यान) क्रिकेटरले पाउन बाँकी तलबमा मासिक १० हजार रुपैयाँ बढाएर दिनका लागि अन्तर्राष्ट्रिय क्रिकेट काउन्सिल (आइसिसी) लाई प्रस्ताव गर्ने निर्णय गरेको छ।
शनिबार बसेको क्यानको भर्चुअल बैठकले क्रिकेटरको सन् २०१९ को तलबमा १० हजार बढाएर दिनका लागि आइसिसीलाई प्रस्ताव गर्ने निर्णय गरेको अध्यक्ष चतुरबहादुर चन्दले जानकारी दिए।
क्यान निलम्बनमा अवस्थामा रहेको सन् २०१९ को तलब आइसिसीले नै उपलब्ध गराउने व्यवस्था छ।
सन् २०२० देखि भने क्यानले महिला तथा पुरुष क्रिकेटरसँग छुट्टै सम्झौता गर्नेछ। त्यसका लागि क्यानले समिति पनि बनाइसकेको छ।
'हामीसँग क्रिकेटरको छुट्टै सम्झौता हुनेछ। त्यसअघि आइसिसीबाट प्राप्त हुने तलबमा १०-१० हजार बढाउन हामीले आइसिसीलाई भन्नेछौं,' उनले भने।
यसअघि पुरुष क्रिकेटरका लागि तीन श्रेणीमा वर्गिकरण गरेर सम्झौता गरिएको थियो। जसमा ए श्रेणीको मासिक ३५ हजार, बी श्रेणीको मासिक २५ हजार र सी श्रेणीको मासिक १५ हजार रुपैयाँ थियो। खेलाडीहरुले सन् २०१७ र २०१८ को एकमुष्ट रकम आइसिसीमार्फत पाएका थिए। सन् २०१९ को तलबमा भने तीनै श्रेणीका खेलाडीले मासिक १० हजार बढेर पाउन सक्नेछन्।
क्यानले खेलाडीलाई असार १५ देखि प्रशिक्षण थाल्न सरकारको अनुमति माग्ने निर्णय गरेको छ। 'हाम्रो चासो खेलाडीलाई सकेसम्म चाडो प्रशिक्षणमा फर्काउने हो। त्यसैले सरकारको नीतिअनुरुप नै असार १५ देखि अभ्यास थाल्नका लागि अनुमति माग्नेछौं,' उनले भने।
अहिलेलाई नेपाली टिमको प्रशिक्षण जगत टमाटाले नै सम्हाल्ने सम्भावना छ। किनकी विदेशी प्रशिक्षक आगामी अगस्टसम्म नआउने अध्यक्ष चन्दले बताए।
दुई घन्टासम्म चलेको बैठकमा प्रदेशमा प्रशिक्षक खटाउने विषयमा पनि छलफल भएको छ।