वेस्ट इन्डिज क्रिकेट टिम ऐतिहासिक टेस्ट सिरिज खेल्नका लागि इंग्ल्यान्ड पुगेको छ। कोरोना भाइरसपछि विदेश भ्रमण गर्ने पहिलो टिम बन्ने क्रममा वेस्ट इन्डिज टिम मंगलबार म्यानचेस्टर पुगेको हो।
कोरोना भाइरसका कारण गत मार्चमा संसारका अधिकांश मुलुकले लकडाउन गरेका थिए। त्यसयता कुनै पनि टिमले दोस्रो देशमा खेलेका थिएनन्।
३९ सदस्यीय वेस्ट इन्डिज टिममा २५ खेलाडी छन्। इंग्ल्यान्ड उड्नुअघि सबैको कोरोना परीक्षण गर्दा नेगेटिभ नतिजा आएको थियो। त्यसपछि उनीहरू चार्टर्ड फ्लाइटमा एन्टिगुवाबाट म्यानचेस्टरका लागि प्रस्थान गरेका थिए।
इंग्ल्यान्ड पुगेका सबैको फेरि कोरोनाको परीक्षण गरिनेछ भने सबै जना क्वारेन्टिनमा बस्नेछन्।
इंग्ल्यान्ड पुगेपछि वेस्ट इन्डिजका कप्तान जासन होल्डरले आफूहरु खेल्नका लागि इंग्ल्यान्ड पुग्नु क्रिकेट र खेलकुदका लागि ठूलो 'स्टेप' भएको प्रतिक्रिया दिएका छन्।
इंग्ल्यान्ड र वेस्ट इन्डिजबीच पहिलो टेस्ट ८-१२ जुलाईमा हुनेछ। यस्तै दोस्रो टेस्ट १६-२० जुलाई र तेस्रो टेस्ट २४-२८ जुलाईमा हुनेछ।
तीन वटै खेल खाली रंगशालामा हुनेछ भने सबै खेलाडी भेन्यू नजिकैको होटलमा बस्नेछन्।
८-१२ जुलाईमा हुने पहिलो टेस्ट १३ मार्चमा न्युजिल्यान्ड र अस्ट्रेलियाबीचको खेलपछिको पहिलो अन्तर्राष्ट्रिय क्रिकेट प्रतिस्पर्धा हुनेछ।