वेस्ट इन्डिजका कप्तान जास होल्डरले आफ्नो टिम पैसाको लोभले इंग्ल्यान्ड भ्रमणमा नआएको बताएका छन्। उनले कोरोनाभाइरसको महामारीका बीच टिम अहिलेको स्थितिलाई सामान्य बनाउनका लागि इंग्ल्यान्ड आएको समेत बताए।
'धेरैले क्रिकेट फर्किएको हेर्न चाहेकाले आएका हौं, बलीको बोका बन्न आएका होइन। यो समयमा हामीले इंग्ल्यान्ड भ्रमण गर्ने पहिले नै तय थियो। हामीले इंग्ल्यान्ड भ्रमणका लागि सबै सम्भावनाको विषयमा कुरा गरेका थियौं। त्यसैले इंग्ल्यान्ड आउन सफल भयौ,' उनले भनेका छन्।
ब्रिटेनमा कोरोनाको प्रभाव बढी छ। अहिलेसम्म ४० हजार बढीको मृत्यु भइसकेको छ। तर वेस्ट इन्डिज टिमबाट खेल्ने क्रिकेटरका क्यारेबियन देशमा कोरोनाको संक्रमण कम छ। यो अवस्थामा कतिपयले पैसाका लागि वेस्ट इन्डिज टिम इंग्ल्यान्ड पुगेको आरोप लगाइरहेका छन्।
तर यो आरोपको खण्डन गर्दै होल्डरले पैसाका कारण इंग्ल्यान्ड भ्रमण नगरेको र स्वास्थ्यको विषयमा सम्झौता नगर्ने बताए।
'यो पैसासँग जोडिएको कुरा होइन। हामी सुरक्षा चाहान्छौं र हाम्रो लागि राम्रो सुरक्षा होस्,' उनले भने,'हामी स्वास्थ्यकर्मी र फ्रन्टलाइनमा बसेर काम गर्ने मानिस होइनौ। तर हामीले यो अवस्थालाई सामान्य बनाउन आफ्नो तर्फबाट प्रयास गर्नु पर्छ।'
कोरोना भाइरसपछि विदेश भ्रमण गर्ने पहिलो टिम बन्ने क्रममा वेस्ट इन्डिज टिम तीन वटा टेस्ट खेल्न मंगलबार इंग्ल्यान्ड पुगेको थियो।
कोरोना भाइरसका कारण गत मार्चमा संसारका अधिकांश मुलुकले लकडाउन गरेका थिए। त्यसयता कुनै पनि टिमले दोस्रो देशमा खेलेका थिएनन्।
३९ सदस्यीय वेस्ट इन्डिज टिममा २५ खेलाडी छन्। इंग्ल्यान्ड पुगेका सबैको कोरोनाको परीक्षण गरिएको छ भने भने सबै जना क्वारेन्टिनमा बसेका छन्।
इंग्ल्यान्ड र वेस्ट इन्डिजबीच पहिलो टेस्ट ८-१२ जुलाईमा हुनेछ। यस्तै दोस्रो टेस्ट १६-२० जुलाई र तेस्रो टेस्ट २४-२८ जुलाईमा हुनेछ।
तीन वटै खेल खाली रंगशालामा हुनेछ भने सबै खेलाडी भेन्यू नजिकैको होटलमा बस्नेछन्।
८-१२ जुलाईमा हुने पहिलो टेस्ट १३ मार्चमा न्युजिल्यान्ड र अस्ट्रेलियाबीचको खेलपछिको पहिलो अन्तर्राष्ट्रिय क्रिकेट प्रतिस्पर्धा हुनेछ।