क्यारेबियन प्रिमियर लिग ट्रिनिडाड एन्ड टोबागोमा आगामी अगस्ट १८ देखि सेप्टेम्बर १० सम्म गर्ने निर्णय गरिएको छ।
यसअघि कोरोना भाइरसका कारण प्रतियोगिता अनिश्चित बनेको थियो।
आयोजकले प्रतिस्पर्धा खाली रंगशालामा गराउने निर्णय गरेको छ भने खेलाडीहरुको तलब ३० प्रतिशतसम्म कटौती गरिनेछ।
३० हजार डलर माथि तलब हुने खेलाडीको ३० प्रतिशत कटौती गर्दा २० हजार भन्दा माथिको १० प्रतिशत तलब काटिनेछ। त्यसभन्दा कम तलब हुनेको कटौती गरिनेछैन।
प्रतियोगिताका लागि खेलाडीहरु १ अगस्टसम्म ट्रिनिडाड पुगिसक्नु पर्नेछ। त्यसपछि खेलाडीहरु क्वारेन्टिनमा बस्नु पर्नेछ।
आयोजकले विदेशी खेलाडीको स्वास्थ्य र अन्य प्रोटोकलका लागि स्वास्थ्य सल्लाहकार समिति गठन गर्नेछ।
प्रतियोगिताको अघिल्लो सिजनमा नेपालका सन्दीप लामिछानेले पनि खेलेका थिए। यो सिजनको भने ड्राफ्ट हुन बाँकी छ।