आइपिएल टिम चेन्नई सुपरकिंग्सले आफ्ना टिम डाक्टरलाई निलम्बन गरेको छ। डा मधु ठोत्तपिलिलले भारतीय सेनाका सहिदको विषयमा विवादित ट्विट गरेपछि चेन्नईले टिमबाट हटाएको हो।
उनले सहिदको अपमान गरेको भन्दै सामाजिक सञ्जालमा व्यापक आलोचना भएको थियो। लगत्तै चेन्नइले उनलाई टिमबाट हटाएको हो।
'चेन्नई सुपर किंग्सका टिम व्यवस्थापन डा मधु ठोत्तपिलिलले गरेको ट्विटको विषयमा जानकार छैन। उनले आफ्नो निजी ह्यान्डलबाट ट्विट गरेका छन्। उनलाई पदबाट निलम्बन गरिएको छ। उनको ट्विटमा चेन्नई दु:खी छ,' चेन्नईले भनेको छ।
यसअघि लद्दाखको गल्वान उपत्यकामा सोमबार राति चिनियाँ सैनिकसँगको झडपमा २० जना भारतीय सैनिकको मृत्यु भएको थियो।
सैनिकको मृत्यु भएको खबरपछि चेन्नईका टिम डाक्टर मधुले 'कफिनमा पिएम केयरको स्ट्रिकर टासिएर आउछ कि आउँदैन' भन्ने विषयमा चासो लागेको भन्दै ट्विट गरेका थिए।
गल्वानमा पछिल्लो समय देखिएको तनाव मत्थर पार्न दुई देशबीच वार्ता चलिरहेका बेला सोमबार राति उक्त झडप भएको थियो। पछिल्लो समय गल्वान उपत्यकामा चिनियाँ सैनिकले भारतीय भूमि अतिक्रमण गरेर गस्ती गरिरहेको भारतको दाबी छ।
४५ वर्षपछि भारत-चीन सीमामा पहिलो पटक भारतीय सैनिकको मृत्यु भएको हो।
भारत र चीनबीच ३ हजार ४ सय ८८ किलोमिटर लामो सीमा जोडिएको छ। त्यसमध्ये अरूणाञ्चलदेखि लद्दाखसम्मको धेरै ठाउँमा लाइन अफ एक्चुयल कन्ट्रोल कुन हो भन्ने टुंगो लागेको छैन।
भारत स्वतन्त्र भएपछि सन् १९६२ मा चीन-भारतबीच युद्ध भएको थियो। उक्त युद्ध चीनले जितेको थियो। त्यसपछि पनि सीमाका विभिन्न ठाउँमा दुई देशका सेना आमनेसामने भइरहन्थे। तर सन् १९७५ यता सीमामा दुबै देशका सैनिकले एकअर्काको ज्यान लिएका थिएनन्।