नेपाली राष्ट्रिय क्रिकेट टिमको प्रमुख प्रशिक्षकका लागि निवेदन दिएकाहरूको अन्तर्वार्ता तिहारअघि लिइने भएको छ।
नेपाल क्रिकेट संघ (क्यान) को शुक्रबार बसेको बोर्ड बैठकले प्रमुख प्रशिक्षक र क्रिकेट म्यानेजरको अन्तर्वार्ता तिहारअघि र अन्य पदको अन्तर्वार्ता तिहारपछि लिने निर्णय गरेको हो।
प्रमुख प्रशिक्षकका लागि ७७ जनाले निवेदन दिएका थिए। जसमा सर्टलिस्टमा परेका १० जनाको अन्तर्वार्ता लिइने भएको हो। १० मध्ये एक जना नेपालको प्रशिक्षक नियुक्त हुनेछन्।
क्यानले गत भदौ १८ गते दरखास्त आह्वान गरेकोमा प्रशिक्षकका लागि विभिन्न १४ देशका ७७ जनाले आवेदन दिएका थिए।
प्रमुख प्रशिक्षक बन्नका लागि लेभल-३ को प्रशिक्षण कोर्स गरेको हुनुपर्ने योग्यता तोकिएको छ। यस्तै आइसिसीको स्थायी सदस्य, पहिलो श्रेणीको टिम, एसोसिएट सदस्य र अन्तर्राष्ट्रिय लिग मध्ये एकमा तीन वर्षको अनुभव हुनु पर्ने मापदण्ड तोकिएको छ। प्रमुख प्रशिक्षक ६० वर्षभन्दा कम उमेरको हुनु पर्नेछ।
बोर्ड बैठकले आगामी मंसिर ३ गते बस्ने संघको वार्षिक साधारण सभाको एजेण्डाहरू पनि तय गरेको छ।
जसमा लेखापरीक्षण, २०२१ को बजेट तथा कार्यक्रम, रणनीतिक योजना निर्माण, जिल्ला तथा प्रदेशिक संघको कार्यविधि निर्माण, संघ पदाधिकारी तथा कर्मचारीको आचार संहिता निर्माण, एन्टी करप्सन, एन्टी डोपिङ र इथिक्स पोलिसी निर्माण आदि वार्षिक साधारण सभाको एजेन्ड तय गरिएको छ।
प्रस्तावित नेपाल प्रिमियर लिग (एनपिएल) को ड्राफ्टमा छलफल गर्दै आगामी वार्षिक साधारण सभामा एजेन्डको रुपमा लैजाने पनि बोर्ड बैठकले निर्णय गरेको छ।
संघको आर्थिक नियमावलीमा छलफल गरिएको र थप छलफल गर्दै अर्को बोर्ड बैठकबाट पारित गर्ने निर्णय गरिएको छ।
नेपाल क्रिकेट एम्पायर तथा स्कोरर संघले प्रस्ताव गरेको विधानलाई नेपाल क्रिकेट संघको मातहत रहने गरी मान्यता दिइएको छ।