नेपाल क्रिकेट संघ (क्यान) का ग्राउन्ड स्टाफसहित कर्मचारीको तलब तीन महिनादेखि रोकिएको छ।
क्यानका सचिव अशोकनाथ प्याकुरेलका अनुसार आइसिसीबाट बजेट प्राप्त हुन ढिलाइ भएपछि ग्राउन्ड स्टाफसहित कर्मचारीको तलब रोकिएको हो।
'हामीले बजेट बनाएर आइसिसीलाई पठाएको निकै समय भइसक्यो। तर विभिन्न कारणले बजेट रिलिज हुन सकिरहेको छैन, त्यसैले ग्राउन्ड स्टाफसहित कर्मचारीलाई तलब पनि दिन सकिएको छैन,' प्याकुरेलले सेतोपाटीसँग भने।
प्याकुरेलका अनुसार क्यान आफ्नो खाताबाट कर्मचारीलाई तलब खुवाउन सक्ने स्थितिमा छैन।
'क्यानको खातामा पैसा छैन। कसैलाई तलब दिने कसैलाई नदिने पनि गरेका छैनौ, 'क्यानको तितो यथार्थबारे उनले भने,'आइसिसीबाट बजेट निकासा हुने बित्तिकै सबैलाई तलब दिन्छौं।'
त्रिवि क्रिकेट मैदान र मुलपानी क्रिकेट मैदानको मर्मत सम्भारका लागि क्यानले १६ जनालाई ग्राउन्ड स्टाफको रुपमा राखेको छ।
समयमै तलब नपाए पछि ग्राउन्ड स्टाफ समस्यामा परेका छन्।
'तलब नआएको चौथो महिना चलिरहेको छ,' एक ग्राउन्ड स्टाफले सेतोपाटीसँग भने,'तलबको भरमा काठमाडौंमा बस्नु पर्ने हामीलाई समस्या परिरहेको छ।'
ग्राउन्ड स्टाफ तथा कर्मचारीले पछिल्लो पटक भदौ महिनाको तलब पाएका थिए।
आइसिसीबाट निलम्बन फुकुवा भए पनि क्यानले नियमित रुपमा आइसिसीको बजेट पाउन सकिरहेको छैन।
१५ महिनाअघि निर्वाचनबाट नयाँ नेतृत्व आएपछि आइसिसीले क्यानमाथिको निलम्बन शर्तसहित फुकुवा गरेको थियो। जसका कारण आइसिसीले लामो प्रक्रिया अपनाए पछि मात्र क्यानलाई बजेट उपलब्ध गराउने गरेको छ।
