भारत र अस्ट्रेलियाबीच जारी तेस्रो टेस्टमा भारतीय क्रिकेटरमाथि जातीय गाली गरेको अभियोगमा ६ जनालाई रंगशालाबाट बाहिर निकालिएको छ।
सिड्नीमा भइरहेको टेस्टमा भारतका तीव्र गतिका बलर मोहमद सिराजमाथि जातीय टिप्पणी गरेपछि ६ जनालाई सिड्नी क्रिकेट मैदानबाट बाहिर पठाइएको हो।
यसअघि दर्शकदीर्घाबाट शनिबार पनि जातीय गाली गरिएको भारतीय खेलाडीहरूले बताएका थिए।
आइतबार खेलको चौथो दिन फिल्डिङका लागि बाउन्ड्री नजिक रहेका सिराजले आफूमाथि दर्शकदीर्घाबाट जातीय गाली आएको भन्दै आफ्ना कप्तान अजिन्का राहाणेलाई जानकारी दिएका थिए।
त्यसपछि राहाणेले अम्पायरसँग यो विषयमा कुरा गरेका थिए। जसका कारण खेल १० मिनेट रोकिएको थियो।
रंगशालामा रहेका सुरक्षा स्टाफ र प्रहरीले दर्शकदीर्घामा रहेका गाली गर्ने व्यक्तिहरुलाई पहिचान गर्दै बाहिर पाठएका थिए।
यो विषयमा अस्ट्रेलियाको न्यु साउथ वेल्स प्रहरीले अनुसन्धान गरिरहेको छ।
शुक्रबार सिराज, जसप्रित बुमराहसहितका खेलाडी माथि जातीय दुर्व्यवहार भएको थियो।
घटनापछि क्रिकेट अस्ट्रेलियाका सुरक्षा प्रमुखले दोस्रो व्यक्तिलाई होच्याउने व्यक्तिलाई अस्ट्रेलियामा ठाँउ नभएको प्रतिक्रिया दिएका थिए।
