इन्डियन प्रिमियर लिग (आइपिएल) २०२१ का लागि आगामी फागुन पहिलो साता अक्सन हुने भएको छ।
आइपिएलका अनुसार आगामी फागुन ६ (फेब्रुअरी १८) मा अक्सन हुनेछ।
अघिल्लो साता आइपिएलमा सहभागी टिमले खेलाडी रिटेन र ट्रेड गरेका थिए। अब टिममा आवश्यक पर्ने खेलाडी अक्सनबाट लिनु पर्नेछ।
जसमा किंग्स ११ पञ्जावमा ९ खेलाडीको कोटा बाँकी छ। ९ मध्ये ५ जना विदेशी खेलाडी राख्न पाइनेछ।
रोयल च्यालेन्जर्स बेंग्लोरले ४ जना विदेशीसहित १३ जना खेलाडी लिन पाउनेछ। राजस्थान रोयल्सले ३ विदेशी खेलाडीसहित ८ खेलाडी भित्र्याउनेछ।
चेन्नई सुपरकिंग्समा १ विदेशीसहित ७ खेलाडीको कोटा खाँली छ। मुम्बईमा ४ विदेशीसहित ७ खेलाडी आबद्ध हुनेछन्।
दिल्ली क्याम्पिटल्समा २ जना विदेशीसहित ६ खेलाडी र कोलकता नाइट राइडर्समा २ विदेशीसहित ८ खेलाडी अक्सनबाट छनोट हुनेछन्।
सबैभन्दा कम कोटा सनराइजर्स हैदरावादमा छ। हैदरावादमा १ विदेशीसहित ३ खेलाडी अक्सनबाट छनोट हुन सक्नेछन्।
आइपिएल २०२१ मा नेपालका युवा लेगस्पिनर सन्दीप लामिछाने नयाँ टिममा आबद्ध हुन सक्नेछन्। सन्दीपलाई दिल्लीले यहि सिजनदेखि रिलिज गरेको थियो।
२०२१ को आइपिएल भारतमा नै हुने वा अन्य देशमा हुने विषयमा अझै टुंगो लागिसकेको छैन। यसअघि कोरोनाका कारण २०२० को आइपिएल युएईमा भएको थियो।
