पाकिस्तानविरूद्धको एकदिवसीय सिरिज इंग्ल्यान्डले क्लिन स्विप गरेको छ। मंगलबार राति सम्पन्न तेस्रो एकदिवसीय खेल पनि जित्दै इंग्ल्यान्डले सिरिज ३-० ले कब्जा गरेको हो।
बर्मिङघममा पहिले ब्याटिङ गरेको पाकिस्तानले ९ विकेटको क्षतिमा ३३१ रन जोडेको थियो।
पाकिस्तानका लागि कप्तान बाबर अजामले शतक प्रहार गरे। उनले १५८ रन जोडे। १३९ बल खेलेका उनले १४ चौका र ४ छक्का प्रहार गरे।
मोहमद रिजवानले ७४ रन र ओपनर इमाम उल हकले ५६ रनको योगदान दिए।
बलिङमा इंग्ल्यान्डका ब्रायडन कार्सले पाँच विकेट लिन सफल भए। उनले १० ओभरमा ६१ रन खर्चिए।
३३२ रनको लक्ष्य इंग्ल्यान्डले ७ विकेटको क्षतिमा ४८ ओभरमा पूरा गर्यो। इंग्ल्यान्डका लागि जेम्स भिन्सले १०२ रनको शतकीय पारी खेले।
लेविस ग्रेगरीले ७७ रन बटुल्दा इंग्ल्यान्डको जित सम्भव भएको थियो।
बलिङमा पाकिस्तानका हरिस राउफले ४ विकेट र सादब खानले २ विकेट हात पारे।
इंग्ल्यान्डका जेम्स भिन्स प्लेयर अफ दि म्याच र सकिब मोहमुद प्लेयर अफ दि सिरिज घोषित भए।
