लिभरपुल इङ्ग्लिश प्रिमियर लिग फुटबलमा पुनः शीर्ष स्थानमा उक्लिएको छ। शनिबार बर्नेमाउथलाई ३-० गोल अन्तरमा हराउँदै लिभरपुल पुनः शीर्ष स्थानमा उक्लिएको हो ।
घरेलु मैदान एनफिल्डमा लिभरपुललाई जिताउन साडियो माने, जर्जियो विजनाल्डम र मोहमद सलाहले एक-एक गोल गरेका थिए।
खेलको २४ औं मिनेटमा मानेले गोल गर्दै लिभरपुललाई सुरूवाती अग्रता दिलाए। त्यसको १० मिनेट पछि ३४ औं मिनेटमा विजनाल्डमले गोल गर्दै लिभरपुलको अग्रता दोब्बर पारे।
पहिलो हाफमा २-० ले अघि रहेको लिभरपुलले दोस्रो हाफको सुरूमै खेलको ४८ औं मिनेटमा गोल गर्दै अग्रता तेब्बर पार्यो। उसका लागि सलाहले गोल गरेका हुन्। बाँकी समय दुबै टिमले गोल गर्न नसक्दा लिभरपुलले ३-० को सहज जित निकाल्यो।
यो जितसँगै लिभरपुल २६ खेलबाट ६५ अंक जोड्दै शीर्ष स्थानमा उक्लिएको छ। यसअघि शीर्ष स्थानमा रहेको म्यान्चेष्टर सिटी ६२ अंकसहित दोस्रो स्थानमा झरेको छ। एक खेल कम खेलेको टोटनह्यम ५७ अंकसहित तेस्रो स्थानमा छ भने ५१ अंकसहित म्यान्यू चौथो स्थानमा उक्लिएको छ। २५ खेलबाट ५० अंक जोडेको चेल्सी पाँचौ स्थानमा छ।
लिभरपुलसँग पराजित बर्नेमाउथ ३३ अंकसहित तालिकाको ११ औं स्थानमा छ।