सासोउलोलाई हराउँदै युभेन्टसले जारी इटालियन सिरि ए मा शीर्ष स्थानको अग्रता ११ मा पुर्याएको छ।
इटालियन सिरि एको शीर्ष स्थानमा रहेको युभेन्ट्सले आइतबार राति सासुओलोलाई ३–० ले हराउँदै सहज जित हात पारेको हो।
युभेन्टसको सहज जितमा क्रिस्टियानो रोनाल्डो, सामी खादिरा र इमरे कानले गोल गरे।
सामी खादिराले गोल गर्दै युभेन्ट्सले खेलमा सुरूवाती अग्रता लिएको थियो। खेलको २३ औं मिनेटमा रोनाल्डोको कडा प्रहार विपक्षी गोलकिपरले पन्च गरेका थिए। उक्त रिबाउन्ड बलमा खादिराले गोल गरेका थिए।
पहिलो हाफ १-० ले अगाडि रहेको युभेन्टसले दोस्रो हाफमा थप २ गोल थप्यो।
खेलको ७० औं मिनेटमा रोनाल्डोले गोल गर्दै युभेन्ट्सको अग्रता दोब्बर पारे। उनले मिरालेम पिजानिकको कर्नरमा हेडमार्फत गोल गर्दै थिए। पोर्चुगिज स्टार रोनाल्डोले 'सिरि ए' मा १८औं र समग्र प्रतियोगितामा २०औं गोल गरेका हुन्। रोनाल्डो जारी सिजनको सिरि एमा सर्वाधिक गोल गर्ने खेलाडीको शीर्ष स्थानमा छन्। युभेन्ट्सका लागि रोनाल्डोले सबै प्रतियोगितामा गरी सिजनमा ३१ खेल खेलिसकेका छन्।
यस्तै खेलको ८६ औं मिनेट इमरे कानले गोल गर्दै युभेन्ट्सको जित सुनिश्चित गरे।
यो जितसँगै जारी लिगमा युभेन्ट्सले २३ खेलबाट ६३ अंक जोडेको छ। लिगमा अपराजित युभेन्ट्सले २० खेलमा जित हात पार्दा ३ खेल बराबरी खेलेको छ। दोस्रो स्थानको नापोलीको ५२ अंक छ भने तेस्रो स्थानको इन्टर मिलानको ४३ अंक भएको छ।
