च्याम्पियन्स लिगमा अवे गोलमा म्यानचेस्टर सिटीलाई पराजित गर्दै टोटनह्याम सेमिफाइनलमा प्रवेश गरेको छ।
क्वाटर फाइनलको दोस्रो लेग अन्तर्गत बुधबार राति भएको खेलमा म्यानचेस्टर सिटीले टोटनह्यामलाई ४–३ ले पराजित गरेपनि टोटनह्याम अवे गोलका आधारमा सेमिफाइनल पुगेको हो ।
पहिलो लेगमा १–० ले विजयी भएको टोटनह्यामले अवे मैदानमा तीन गोल गरेपछि समग्रमा ४–४ को नतिजामा अवे गोलले अगाडी भएपछि उसले सेमिफाइनलको यात्रा तय गरेको हो ।
हिजोको खेलमा पहिलो अग्रता सिटीले लियो। उसका लागि लागि रहिम स्ट्रर्लिङ्गले खेलको चौथो मिनेटमा गोल गरे। त्यसपछि टोटनह्यामले ७ औं र १० औँ मिनेटमा गोलगर्यो र सिटीलाई दबाबमा पुर्यायो। उसका लागि ती दुबै गोल सन हेङ–मिनले गोल गरेका थिए ।
११ औँ मिनेटमा सिटीका बर्नार्डो सिल्भाले सिटीका लागि बराबरी गोल गरेपछि स्ट्रर्लिङ्गले २१ औँ मिनेटमा गोल गरे जसका कारण पहिलो हाफ ३-२ को नतिजामा सकियो ।
त्यसपछि खेलको दोश्रो हाफको ५९ औँ मिनेटमा सर्जियो अग्युरोले गोल गरे र सिटीको सेमिफाइनल यात्राको आशालाई जीवित राखे।
तर ७३ औँ मिनेटमा फर्नान्डो लोरेन्तेले टोटनह्यामका लागि गोल गरे जसका कारण खेल समग्रमा ४–४ को बराबरी पुग्यो र अवे गोलको फाइदा टोटनह्यामले पायो।
यस म्याचका दौरान खेलको ९४ औं मिनेटमा स्ट्रलिङले सिटीका लागि पाँचौ गोल गरे तर उनको सो गोल भिएआरका कारण अस्वीकृत भयो।
सेमिफाइनलमा डच क्लब अजाक्ससँग टोटनह्यामको भिडन्त हुनेछ।