नेपालको लिग च्याम्पियन मनाङ मर्स्याङ्दी क्लबले बुधबार एएफसी कपको अन्तिम खेल खेल्दैछ।
प्रतियोगिताबाट यसअघि नै बाहिरिएको मनाङले बुधबार दिउँसो सवा चार बजे सातदोबाटोस्थिति एन्फा कम्प्लेक्समा भारतको चेन्नइयीन एफसीसँग खेल्दैछ।
यसअघि खेलेका ५ मध्ये ३ खेलमा हार र २ खेलमा बराबरी खेलेको मनाङ अझै जितविहीन छ। अबहानी ढाकाविरुद्धको अघिल्लो खेलमा त मनाङले ५–० को हार बेहोर्यो। त्यसैले मनाङका लागि बुधबारको खेल शाख जोगाउने चुनौती हुनेछ।
मनाङका प्रशिक्षक छिरिङ लोप्साङ गुरुङले अन्तिम खेलमा राम्रो खेल्ने बताउँछन्। खेलअघिको पत्रकार सम्मेलनमा उनले जित निकालेर एएफसी कपको सुखद् अन्त्य गर्ने बताए।
‘हामी एएफसी कपको अन्तिम खेल खेल्दैछौं। हाम्रो मुख्य लक्ष्य सुखद नतिजा निकालेर प्रतियोगिताको अन्त्य गर्नु हो’ गुरुङले भने, ‘ढाकाविरुद्धको पछिल्लो खेलपछि हाम्रो आत्मविश्वास घटेको छैन। किनकी हाम्रो समूहमा रहेका तीन वटै टिम उच्च व्यवसायिक क्लब हुन्। हामीले उनीहरुबाट धेरै सिक्न बाँकी छ।’
चेन्नइयीनका प्रशिक्षक जोन चार्ल्स ग्रेगोरीले जित निकाले अघिल्लो चरणमा पुग्ने विश्वास व्यक्त गरे। उनले मनाङको घरेलु मैदानमा खेल्दा दबाब महसुस नगरेको बताए।
समूह ‘ई’ मा पाँचौ चरणको खेल सकिदा ढाका १० अंक जोडेर शीर्ष स्थानमा छ। दोस्रो स्थानको चेन्नइयीन ८ अंकसहित दोस्रो स्थानमा छ।
अन्तिम चरणअघि ढाका र चेन्नइयीनको अघिल्लो चरणमा पुग्ने सम्भावना छ। भारतकै पञ्जाव ५ अंकसहित तेस्रो स्थानमा छ। समूहको शीर्ष टिम मात्र अघिल्लो चरणमा पुग्ने भएको हुँदा पञ्जावको दोस्रो चरण सम्भावना सकिएको छ। अंक तालिकाको पुछारको मनाङको २ अंक छ।
यसै सिजनबाट एएफसी कपमा डेब्यू गरेको मनाङलाई एन्फा कम्प्लेक्स सातदोबाटोमा भएको पहिलो खेलमा बंगलादेशको लिग च्याम्पियन ढाकाले १-० गोलले पराजित गरेको थियो। दोस्रो खेलमा मनाङलाई चेन्नइयीनले २-० गोलले हराएको थियो।
तेस्रो चरणको खेलमा मनाङ र पञ्जावबीच भिडन्त भएको थियो। भारतको भुनवेश्वरमा भएको खेलमा मनाङले २-२ को बराबरी खेलेर एएफसी कपमा पहिलो अंक र पहिलो गोल गर्न सफल भएको थियो।
चौंथो चरणको खेलमा मनाङ र पञ्जावबीच सातदोबाटोमा प्रतिस्पर्धा भयो। खेल १-१ को बराबरीमा सकिएको थियो।
पाँचौ चरणको खेलमा भने मनाङले ठूलो हार बेहोरेको थियो। मनाङलाई ढाकाले ५-० हराएको थियो।
