पोर्चुगलका सुपरस्टार फुटबलर क्रिस्टियानो रोनाल्डोसँग तुलना गरिएका १९ वर्षीय जोएओ फेलिक्स स्पेनिस क्लब एट्लेटिको म्याड्रिडमा आवद्ध हुने भएका छन्।
पोर्चुगिज खेलाडी फेलिक्सलाई एट्लेटिकोले १२६ मिलियन युरोमा आबद्ध गर्न लागेको हो। पोर्चुगिज क्लब बेन्फिकाबाट उनी स्पेन जान लागेका हुन्।
फेलिक्सलाई आबद्ध गर्ने एट्लेटिकोको प्रस्तावको विषयमा सकारात्मक भएको बेन्फिकाले जनाएको छ। एट्लेटिकोले किस्तामा रकम तिर्ने विषयमा छलफल भइरहेको क्लबको भनाइ छ।
उनी एट्लेटिकोमा आबद्ध पाँचौ महँगा खेलाडी हुनेछन्। सर्वाधिक महँगा खेलाडी नेइमार हुन्। त्यसपछि केलियन एमबाप्पे, फिलिप काउटिन्हो र उस्मान डेम्बेले महँगा खेलाडीमा पर्छन्।
पोर्चुगलका फरवार्डले २०१८ को सिजनको सुरुबाट व्यवसायिक खेलमा डेब्यू गरेका थिए। पोर्चुगिज क्लब बेन्फिकाका लागि उनले सिजनमा १५ गोल गरे भने ९ पटक गोलका लागि पास दिए। उनकै प्रभावशाली खेलमा लिस्बनको क्लब बेन्फिकाले लिगको उपाधि जित्यो।
उनले युरोपा लिगमा पनि आफ्नो छाप छाडे। जर्मन क्लब फ्रान्सफर्टविरुद्ध गत अप्रिलमा खेलिएको खेलमा उनले ह्याट्रिक गरेका थिए। उनी बेन्फिकाका लागि ह्याट्रिक गर्ने युवा खेलाडी बनेका थिए। यस्तै उनी युरोपियन फुटबलमा एकै खेलमा तीन गोल गर्ने पोर्चुगलका युवा खेलाडी थिए। यति मात्र होइन उनी युरोपा लिगमा ह्याट्रिक गर्ने युवा खेलाडी बने।
क्लब फुटबलमा लोभलाग्दो खेल देखाएपछि उनी पोर्चुगल राष्ट्रिय टिममा पर्न सफल भए।
फेलिक्सले एएफसी पोर्टोबाट युथ फुटबलमा आफ्नो करिअर सुरु गरेका थिए। तर सन् २०१५ मा उनी दुब्लो भएका कारण पोर्टोले रिलिज गरेको थियो। त्यसपछि उनी बेन्फिकामा पुगे।
सन् २०१६ मा १६ वर्षको उमेरमा उनी बेन्फिकाको रिजर्भ टिममा परे। सेप्टेम्बर २०१६ मा उनले रिजर्भ टिममा डेब्यू गरेर सबैभन्दा युवा खेलाडीको रेकर्ड बनाएका थिए।
२०१८–१९ को सिजनमा उनले ठूलो सफलता पाए। गत नोभेम्बरमा क्लबका लागि सम्झौता गरे त्यो पनि कीर्तिमानी रकममा। उनले सन् २०२३ सम्मका लागि १२० मिलियन रिलिज क्लजमा सम्झौता गरेका थिए।
उनले अगस्टमा बेन्फिकाका लागि बोएभिस्टाविरुद्धको खेलमा डेब्यू गरे। शहरी प्रतिद्वन्द्वी स्पोर्टिङ लिस्बनविरुद्धको अर्को खेलमा उनले गोल गरे।
उनले ८६ मिनेटमा हेडरमार्फत क्लबका लागि पहिलो गोल गरेका थिए। त्यसपछि प्रशिक्षकको विश्वास जितेका उनले क्लबका लागि सिजनमा सबै प्रतियोगिता गरी ४३ खेल खेले भने २० गोल गरे।
इंग्ल्यान्ड, इटाली, स्पेन, जर्मनी, पोर्चुगल र नेदरल्यान्डको लिग मध्ये उनी बढी गोल गर्ने दोस्रा टिनएजर खेलाडी हुन्। बढी गोल गर्ने टिनएजर जर्मन क्लब वायर लिभरकुजेनका १९ वर्षीय मिडफिल्डर काइ हाभेर्ट हुन्।
फेलिक्सलाई अहिले पोर्चुगिज सुपरस्टार रोनाल्डो र मिडफिल्डर बेर्नान्डो सिल्भासँग तुलना गर्न थालिएको थियो। कतिपयले उनलाई ब्रजिलका काकासँग दाँजेका थिए।