फ्रेन्च लिगमा टुलुसमाथि ४-० गोल फराकिलो जित हासिल गरेको पेरिस सेन्ट जर्मेनका दुई स्टार खेलाडी घाइते बनेका छन्।
टुलुससँगको खेलमा किलियन एमबाप्पे र इडिसन कभानी घाइते बनेका हुन्। कभानी खेलको १४ औं मिनेटमा घाइते हुँदै मैदान छाड्न बाध्य भएका थिए भने एमबाप्पेले दोश्रो हाफमा तिघ्रामा समस्या आएपछि मैदान छाडेका थिए।
आफ्ना स्टार खेलाडीलाई चोटका कारण गुमाएको पिएसजीले जितका चारै गोल खेलको दोश्रो हाफमा गरेको हो।
कभानीको सट्टामा मैदान छिरेका इरिक म्याक्सिम चउपो-मोटिङले खेलको ५० औ मिनेटमा गोल गर्दै टोलीलाई पहिलो अग्रता दिलाएका थिए।
त्यसपछि पिएसजीले टुलुसबाट १ गोल आत्मघाती गोलका रूपमा उपहार पायो र उसको अग्रता दोब्बर भयो।
म्याथ्यु गोन क्लाभेगले खेलको ५५ औं मिनेटमा सो आत्मघाती गोल गरेका थिए। त्यसपछि खेलको ७५ औं मिनेटमा इरिकले व्यक्तिगत दोश्रो गोल गर्दै पिएसजीलाई ३-० को अवस्थामा पुर्याए भने ८३ औं मिनेटमा मार्क्यून्होसले टोलीका लागि चौथो गोल गरे।