इटालियन सिरी ए लिगमा युभेन्टसले ब्रेसियालाई पराजित गरेको छ।
मंगलबार भएको खेलमा आफ्ना स्टार स्ट्राइकर क्रिश्चियानो रोनाल्डो बिना मैदानमा उत्रेको युभेन्टसले ब्रेसियालाई २-१ गोलले पराजित गरेको हो।
यस खेलमा पहिलो अग्रता भने ब्रेसियाले लिएको थियो। उसले खेलको चौथो मिनेटमा गोल गर्दै साविकको विजेता युभेन्टसमाथि अग्रता बनाएको थियो। सो गोल अलफ्रेडो डोनारूनाले गरेका थिए।
ब्रेसिया यसै सिजनमा बढुवा भएर आएको टोली हो।
लिगमा युभेन्टसले ४० औं मिनेटमा बराबरी गर्यो। ब्रेसियाका जोन चान्सलरले गरेको आत्मघाती गोलबाट युभेन्टसले बराबरी गर्ने मौका पाएको हो।
त्यसपछि खेलको ६३ औं मिनेटमा मिलालेम पियाचिनले गोल गर्दै टोलीलाई २-१ को अवस्थामा पुर्याए र खेल युभेन्टसको पक्षमा गयो।
जितसँगै युभेन्टस लिगको शीर्ष स्थानमा उक्लिएको छ। उसले पाँच खेलबाट १३ अंक जोडेको छ।