साफ यु–१८ च्याम्पियनसिपमा खराब नतिजापछि प्रशिक्षक चेतनारायण श्रेष्ठले राजीनामा दिएका छन्। उनले हारको जिम्मेवारी लिँदै राजीनामा दिएको अखिल नेपाल फुटबल संघले जनाएको छ।
अघिल्ला २ संस्करणको च्याम्पियन नेपाल जारी साफ यु-१८ च्याम्पियनसिपको समूह चरणबाटै बाहिरिएको थियो।
श्रेष्ठ यसअघि जेठ २८ गते यु–१८ टिमको प्रशिक्षकमा नियुक्त भएका थिए। एन्फाले श्रेष्ठलाई मुख्य प्रशिक्षकको जिम्मेवारी दिँदा सहायक प्रशिक्षकमा सनोज श्रेष्ठ र गोलकिपर प्रशिक्षकमा चनुराम चौधरी नियुक्त दिएको थियो।
सोमबार हल्चोकस्थित सशस्त्र प्रहरी बलको मैदानमा भएको समूह ‘ए’ को खेलमा भुटान र माल्दिभ्सले गोलरहित बराबरी खेलेसँगै नेपाल समूह चरणबाटै बाहिरिएको थियो।
नेपाल आइतबार भएको आफ्नो दोस्रो खेलमा भुटानसँग ३–० ले पराजित भएको थियो। त्यसअघि नेपाल र माल्दिभ्सले १-१ गोलको बराबरी खेलेका थिए।
सन् २०१६ र २०१८ को विजेता नेपाल समूह चरणबाटै बाहिरिने क्रममा जितबिहिन समेत भयो।
समूहबाट भुटान ४ अंक जोडेर समूह विजेता र माल्दिभ्स २ अंक जोडेर उपविजेताको रुपमा अन्तिम चारमा पुगे भने नेपालले १ अंक मात्र जोड्यो।