नेपाल यु–२३ राष्ट्रिय फुटबल टिमले म्यानमारको यु–२३ टिमसँग मैत्रीपूर्ण खेल खेल्ने भएको छ। नेपाल र म्यानमारबीच आगामी शुक्रबार दोहामा खेल हुने अखिल नेपाल फुटबल संघ (एन्फा) ले जनाएको छ।
आगामी मंसिर १५ देखि नेपालमा हुने १३औं दक्षिण एसियाली खेलकुद (साग) का लागि नेपाली यु–२३ टिमले तीन महिनादेखि तयारी गरिरहेको छ। सागकै तयारीका लागि नेपालले म्यानमारसँग मैत्रीपूर्ण खेल खेल्ने एन्फाको भनाइ छ।
यु–२३ टिममा तीन जना सिनियर टिमका खेलाडी राख्ने पाइने नियम छ।
'म्यानमारविरुद्ध मैत्रीपूर्ण खेल्न पाउनु राम्रो पक्ष हो। हाम्रा लागि यो कठिन चुनौती हो। जसले सागको तयारीका लागि सहयोग पनि गर्नेछ,' यु–२३ टिमका प्रशिक्षक बालगोपाल महर्जनले भने।
नेपाली टिम मंगलबार विहान दोहा प्रस्थान गर्ने कार्यक्रम छ।
नेपाली टिम
अनन्त तामाङ, अञ्जन बिष्ट, विक्रम लामा, सुजल श्रेष्ठ, दिनेश राजवंशी, तेज तामाङ, अभिषेक रिजाल, सुनील बल, हेमन्त थापामगर, छिरिङ गुरुङ, अर्पण कार्की, दीप कार्की, देव लिम्बु, विकास खवास, रोमन लिम्बु, नितिन थापा, सेसेहाङ आङदेम्बे, मिक्छेन तामाङ, रामचन्द्र वाजी, प्रेजेन तामाङ, रेजिन सुब्बा, राजिव लोप्चन, नवयुग श्रेष्ठ, सुमन अर्याल।
