सरस्वती युवा क्लब सिजनको सहिद स्मारक ए डिभिजन लिगमा रेलिगेसनमा परेको छ।
लिगको महत्वपूर्ण खेलमा सोमबार च्यासल युथ क्लबसँग २-१ गोलले पराजित भएसँगै जारी लिगको अंक तालिकाको पुछारमा रहेको सरस्वती बी डिभिजनमा झरेको हो।
रेलिगेसनबाट बच्च सरस्वतीले च्यासलविरुद्धको १२औं चरणको खेल जित्नै पर्ने बाध्यता थियो। तर पराजय भोगेपछि सरस्वती अन्तिम चरणको खेलअघि नै रेलिगेसनमा परेको हो।
कोटेश्वरको क्लब सरस्वतीले जारी लिगमा १२ खेल खेल्दा केलब ४ अंक मात्र जोडेको छ। सरस्वतीले हिमालयन शेर्पा क्लबविरुद्ध जित हात पारेको थियो। त्यसअघि उसले ब्रिगेड ब्वाइजसँग गोलरहित खेल्दै अंकको खाता खोलेको थियो।
गत सिजन नवौं भएको सरस्वती २०६५ पछि रेलिगेसनमा परेको हो।
२०६३ सालमा पहिलो पटक ए डिभिजन लिग खेलेर इतिहास बनाएको सरस्वती पहिलो सिजनमै रेलिगेसनमा परेको थियो। २०६४ मा बी डिभिजनको शीर्ष बनेसँगै सरस्वती फेरि ए डिभिजनमा फर्किएको थियो। ए डिभिजनमा फर्किएपछि उसले २०६८ सालमा फेरि लिग खेलेको थियो।
यता सरस्वती रेलिगेसनमा परेपछि सशस्त्र प्रहरी बलको एपिएफ क्लब भने जोगिएको छ। अंक तालिकको पुछारबाट दोस्रो स्थानमा रहेको एपिएफले अन्तिम खेलअघि ८ अंक जोडेको छ। अब अन्तिम चरणमा एपिएफले हार बेहोरे पनि केहि फरक पर्ने छैन। किनकी सिजनमा एन्फाले पुछारको टिमलाई मात्र रेलिगेसन गर्ने व्यवस्था गरेको छ।
हुन त एपिएफलाई रेलिगेसनबाट जोगिन सोमबार नै भएको १२ औं चरणमा हात पारेको जित महत्वपूर्ण बन्यो। एपिएफले सोमबार विहान फ्रेण्ड्स क्लबलाई ५-२ ले हराउँदै महत्वपूर्ण ३ अंक जोड्यो। एपिएफको जितमा आसिस लामा र प्रविन स्याङ्तानले २-२ गोल गर्दा टोपबहादुर विष्टले १ गोल थपे।