खेल सकिन १० मिनेट भन्दा कम समय रहेको अवस्थामा साडियो मानेले गरेको गोलमा लिभरपुलले साँघुरो जित हात पारेको छ।
सोमबार इङ्लिश प्रिमियर लिग अन्तरगत भएको खेलमा साडियो मानेले खेलको ८१ औं मिनेटमा गरेको गोलमा लिभरपुल ३-२ ले विजयी भएको छ।
उसले वेस्ट हाम युनाइटेडलाई पराजित गरेको हो।
खेलमा पहिलो अग्रता लिभरपुलले खेलको ९ औं मिनेटमा लिएको थियो। उसका लागि सो गोल वाइनाल्डमले गरेका थिए। सो अग्रतालाई खेलको १२ औं मिनेटमा डियोपले गोल गरेपछि वेस्ट हमले बराबरी गरेको थियो।
त्यसपछि दोश्रो हाफमा फोर्नाल्सले गोल गरे र खेलको ५४ औं मिनेटमा वेस्ट हमलाई अग्रता दिलाए।
उसको सो अग्रतालई ६८ औं मिनेटमा मोहम्मद सलाहले गोल गर्दै खेललाई बराबरीमा ल्याए।
यसरी २-२ को बराबरीमा पुगेको खेलमा साडियोले गोल गरेसँगै लिभरपुलले नतिजा ३-२ ले आफ्नो पक्षमा पार्यो।
जितपछि लिगमा यस सिजन लगातार शीर्ष स्थानमा रहेको लिभरपुलले आफूलाई लिग उपाधिको थप नजिक लगेको छ। लिगमा २७ खेलबाट हालसम्म उसले ७९ अंक जोडिसकेको छ।
यसैगरी उसलाई पछ्याइरहेको म्यानचेस्टर सिटीको ५७ अंक छ।