अखिल नेपाल फुटबल संघ (एन्फा) ले आफ्ना गतिविधि र निर्धारित कार्यक्रम स्थगित गर्ने निर्णय गरेको छ।
कोरोनाभाइरसको संक्रमण खतराका कारण एन्फाले चैत ३ गतेदेखि हुने महिला राष्ट्रिय लिग स्थगित गरेको छ।
यस्तै पुरुष राष्ट्रिय टिमको प्रशिक्षण पनि स्थगित गर्ने एन्फाले निर्णय गरेको छ। नेपाली टिम फिफा विश्वकप र एसिया कप छनोटको तयारीमा रहेको थियो।
यस्तै एन्फाले सबै जिल्ला फुटबल संघलाई फुटबल प्रतियोगिताहरु स्थगित गर्न पनि निर्दशन दिएको छ।
एन्फाले अर्को सूचना जारी नभएसम्मका लागि गतिविधि नगर्न भनेको छ।
यसैबीच कोरोनाकै कारण रुपन्देहीको तिलोत्तमा गोल्डकप पनि स्थगित गरिएको छ।
यसअघि नेपालमा चैतमा हुने फिफा विश्वकप छनोटअन्तर्गत अस्ट्रेलिया र चाइनिज ताइपेईविरुद्ध खेल पनि स्थगित गर्न फिफा र एएफसी सहमत भएका थिए।
बक्सिङ छनोट पनि स्थगित
गणेशमान सिंहको स्मृतिमा सञ्चालन भइरहेको राष्ट्रिय बक्सिङ प्रतियोगिताका गण्डकी, प्रदेश ५, कर्णाली र सुदूरपश्चिम प्रदेशको छनोट प्रतियोगिता र काठमाडौंमा आगामी चैत १८ देखि २२ गतेसम्म तय भएको राष्ट्रिय प्रतियोगिता अर्को सूचना जारी नभएसम्मका लागि स्थगित भएको छ।