इङ्लिश प्रिमियर लिगमा लिभरपुलले २२ औं जित दर्ता गरेको छ।
लिग अन्तरगत बोर्नमाउथलाई २-१ ले पराजित गर्दै उसले लिगमा लगातार २२ औं खेलमा जित हात पारेको हो।
जितसँगै लिभरपुल ३० वर्षपछि लिग उपाधिको अझ नजिक पुगेको छ।
हिजोको खेलमा पहिलो अग्रता भने बोर्नमाउथले लिएको थियो। उसले खेलको ९ औं मिनेटमा सि विल्सनको गोलमा अग्रता लिएको थियो।
सो अग्रतालाई २५ औं मिनेटमा मोहम्मद सालहले गोल गर्दै बराबरी गरिदिए।
त्यसपछि ३३ औं मिनेटमा साडियो मानेले गोल गर्दै लिभरपुललाई २-१ को नतिजामा पुर्याए। दोश्रो हाफमा दुबै टोलीबाट थप गोल हुन सकेन र खेल लिभरपुलको पक्षमा गयो।
जितपछि लिगको शीर्ष स्थानमा कब्जा जनाइरहेको लिभरपुलको २९ खेलबाट ८२ अंक भएको छ।
यसैगरी लिग अन्तरगत शनिबार भएका अन्य खेलहरूमा आर्सनलले वेस्टहमलाई १-० ले पराजित गर्यो भने टोटनहम बर्नलीसँग १-१ को बराबरीमा रोकियो।
वाट्फोर्ड क्रिष्टल प्यालेससँग १-० ले पराजित हुँदा नर्विच र साउथह्याम्प्टन क्रमशः शेफिल्ड युनाइटेड र न्यूक्यासलसँग पराजित भए।
यस्तै वुल्भस र ब्राइटन गोलरहित बराबरीमा रोकिए।
