कोरोनाभाइरस संक्रमणको खतराको कारण अखिल नेपाल फुटबल संघ (एन्फा) ले चैत १२ गते सम्मका लागि एन्फा सचिवालय बन्द गर्ने भएको छ।
राष्ट्रिय खेलकुद परिषद्ले सम्पूर्ण खेलकुद गतिविधि बन्द गर्न निर्णय गरेकाले आफ्नो कार्यालय बन्द गर्ने एन्फाले मंगलबार निर्णय गरेको हो।
राष्ट्रिय खेलकुद परिषद्ले भने कुनै संघको कार्यालय बन्द गर्न नभनेको जनाएको छ।
'अहिलेको अवस्थामा हामीले सम्पूर्ण खेल गतिविधि रोक्नु भनेको हो,' परिषद्का सदस्यसचिव रमेशकुमार सिलवालले भने,'कार्यालय बन्द गर्न भनेको छैन। त्यसो भए त परिषद् पनि बन्द हुनु पर्ने हो।'
उनले एन्फाले कार्यालय बन्द गर्ने निर्णयको विषयमा जानकारी नभएको बताए। उनले भने,'यो कुरा एन्फालाई नै सोध्नु पर्छ।'
एन्फाका महासचिव इन्द्रमान तुलाधरले एन्फाका कामहरु इमेलबाट हुने भएकाले कार्यालय बन्द गर्ने निर्णय गरेको बताए।
'हाम्रा सबै कामहरु इमेलबाट हुन्छन्, अन्य गतिविधि नहुने भएपछि काम नै हुन्न। काम नभएपछि किन अफिस आउनु,' उनले भने।
एन्फाले कार्यालय बन्द गर्ने निर्णयसँगै जारी सहिद स्मारक बी डिभिजन लिग पनि स्थगित गरेको छ।
एन्फाको आयोजना गर्ने सबै गोष्ठी, सभा सेमिनार तथा अन्य फुटबल प्रतियोगिताहर लगायतका फुटबल कार्यक्रम स्थगित भएका छन्।
एन्फा टेक्निकल सेन्टर धरान र बुटवल लगायत सातदोबाटोको एकेडेमी चैत १२ सम्मका लागि बन्द रहने भएको छ।
यस्तै चैत १६ गते हुने १९औं एन्फा कंग्रेस बैठक स्थगित गरिएको छ।
फिफा र एएफसीको प्रतिनिधिहरुले संक्रमणको सम्भावित जोखिमका कारण कार्यक्रममा उपस्थित हुन असमर्थ भएको जानकारी प्राप्त भएकाले अर्को सूचना जारी नभएसम्मका लागि एन्फा कंग्रेस स्थगित भएको हो।
