म्यानचेस्टर युनाइटेडका पूर्व मिडफिल्डर मरुआन फेलाइनीलाई कोरोना भाइरसको संक्रमण भएको छ।
फेलैनीले ट्वीटरमार्फत आफूलाई कोरोना भाइरसको संक्रमण भएको जानकारी दिएका हुन्।
३२ वर्षे फेलैनी हाल चीनको एसहान्दोङ एलयुनाङबाट व्यवसायिक फुटबल खेल्ने गर्छन्। संक्रमित उनले छिट्टै खेलमा फर्किने आशा व्यक्त गरेका छन्।
चिनियाँ संचारमाध्यमका अनुसार फेलैनीलाई जिनान अस्पतालमा आइसोलेसनमा राखिएको छ।
इङ्लिश प्रिमियर लिगमा ११ सिजन बिताएका उनी गत वर्षमात्र चिनियाँ क्लबमा भित्रिएका हुन्।
भर्खरै प्रशिक्षणका लागि चीन फर्किएका उनी चिनियाँ सुपर लिगमा संक्रमित हुने एकमात्र खेलाडी हुन्।
क्लबले जारी गरेको विज्ञप्तिमा क्वारेन्टाइन अवधिमा गरिएको परीक्षणमा उनमा कोरोना भाइरसको संक्रमण भेटिएको जनाइएको छ।
'यस अवधिमा खेलाडीको शारिरिक तापक्रम सामान्य रहेको थियो र अन्य कुनै अप्ठ्यारो भेटिएको थिएन। उनले तोकिएको स्वास्थ्य संस्थाबाट थप निगरानी र उपचार पाएका छन्', विज्ञप्तिमा भनिएको छ।
