इटालियन क्लब युभेन्ट्सका खेलाडी तथा स्टाफहरु आफ्नो चार महिनाको तलब कटौती गर्न सहमत भएका छन्।
कोरोनाभाइरसका कारण इटालीको फुटबलसहित सबै गतिविधि अनिश्चितकालका लागि बन्द भएपछि क्लबहरु धरासायी बनिरहेका छन्। जसका कारण क्लबका खेलाडी तथा स्टाफले आर्थिक रुपमा सहयोग गर्न तलब कटौती गर्न सहमती जनाएका हुन्।
तलब कटौती गर्ने सहमती भएसँगै क्लबलाई ९० मिलियन युरो राहत हुनेछ।
तलब कटौती गर्ने प्रस्तावमा मुख्य प्रशिक्षक माउरिजियो सारी र स्ट्राइकर क्रिस्टियानो रोनाल्डोले सहमति दिएका थिए। अब उनीहरुले मार्च, अप्रिल, मे र जुनको तलब लिने छैनन्।
युरोपमा कोरोनाबाट सबैभन्दा बढी इटालीका जनता संक्रमित भएका छन्। इटालीमा अहिलेसम्म १० हजार बढीको मृत्यु भइसकेको छ।
इटालियन सिरि एको साविक विजेता युभेन्ट्सका तीन खेलाडीलाई कोरोना भएको पुष्टि भइसकेको छ। डानिले रुगानी, ब्लासी माटुइडी र पाउलो डिबालालाई कोरोना भएको छ। तीनै जनाको स्वास्थ्य सामान्य रहेको छ।