कोरोना भाइरसबाट संक्रमित पूर्वराष्ट्रिय फुटबलर रञ्जित श्रेष्ठको तेस्रो परीक्षणको नतिजा नेगेटिभ आएको छ।
एक साता अघि कोरोनाबाट संक्रमित भएका रञ्जितको यसअघि दुई वटा परीक्षणको नजिता पोजेटिभ आएको थियो।
रोजगारीका लागि दुबईमा रहेका रञ्जितले आइतबार तेस्रो नतिजा आएको बताएका हुन्।
'यसअघि दोस्रो नतिजा पनि पोजेटिभ आएको थियो। तर आइतबार तेस्रो नतिजा नेगेटिभ आयो,' उनले भने।
उनले कोरोना लागेपछि डराउने पर्ने अवस्था नभएको पनि बताए। कोरोनापछि आफू स्वास्थ्यको बारेमा सचेत भएको उनको भनाइ छ।
कोरोना लागेपछि मैले आफ्नो स्वास्थ्य कतिको महत्वपूर्ण रहेछ भन्ने सन्देश पाए। रोग लागेर मर्छु भनेपछि जो पनि डराउदो रहेछ,' उनको भनाइ छ।
'यो समयमा कसरी खाना खाने भन्ने कुरा सिकियो। डाइटिङ गरेँ। नेपालमा खाने जस्तै दाल भात तरकारी खाएँ। तातोपानी खाएँ। खानामा गरम मसला प्रयोग गरेँ। वाफ ज्यादा लिने गरेँ। मलाई कोभिडले काम गर्न पर्ने समय तालिका बनायो। १२ दिनमा म अनुशासनमा हिडेँ। यसले फरक परिवर्तन ल्याएकोमा खुसी लाग्यो।'
उनको चौथो परीक्षणका लागि स्वाब लिइसकेको छ। यसको नतिजा दुई तीन दिनमा प्राप्त हुने श्रेष्ठले बताए। चौथो नतिजा नेगेटिभ आउनेमा उनी आशावादी छन्। चौथो नतिजा नेगेटिभमा आएपछि उनी कोरोनामुक्त हुनेछन्। त्यसपछि पनि तत्काल काममा नजाने उनको भनाइ छ।
यसअघि गत वैशाख २९ गते उनले आफूलाई कोरोना भएकोले सेल्फ आइसोलेसनमा बसेको सार्वजनिक गरेका थिए।
अखिल नेपाल फुटबल संघ (एन्फा) एकेडेमीका दोस्रो ब्याचका खेलाडी रञ्जित सन् २०१० मा बंगलादेशको ढाकामा भएको दक्षिण एसियाली खेलकुद (साग) नेपाली राष्ट्रिय टिममा थिए।
सो टिममा जुमानु राई, सागर थापा, विकास मल्ल, किरण चेम्जोङ, रोहित चन्दसहित विराज महर्जन, रविन श्रेष्ठ, सुमन सुवेदी, नुरराज काफ्ले र विकास सिंह क्षेत्री नेपाली टिममा थिए। यस्तै नीराजन खड्का, भोला सिलवाल, रञ्जित श्रेष्ठ, योगेश श्रेष्ठ, लक्ष्मण रुचाल, चेतन घिमिरे, सन्तोष साहुखल, अनिल गुरुङ, भरत खवास र नीराजन मल्लले ढाका सागमा खेल्ने अवसर पाएका थिए।
ए डिभिजन लिग फ्रेण्ड्सबाट खेलेका उनी पछिल्लो समय युएईमा छन्।
उनले नेपालको उमेर समूहको राष्ट्रिय टिमबाट पनि खेलेका थिए।