युरोपियन च्याम्पियन्स लिगअन्तर्गत इंग्लिस क्लब लिभरपुल र स्पेनिस क्लब एट्लेटिको म्याड्रिडको खेलका दौरान कोरोना भाइरस फैलिएको एक रिपोर्टले देखाएको छ।
जसका कारण लिभरपुल सिटीमा ४१ जनाको मृत्यु भएको रिपोर्टमा उल्लेख छ।
गत मार्च ११ मा लिभरपुलको मैदानमा स्पेनिस क्लब एट्लेटिको म्याड्रिड र घरेलु टिम लिभरपुलबीच भएको खेलपछि कोरोना संक्रमण बढेको रिपोर्टमा उल्लेख छ।
खेलमा ५२ हजार दर्शक रंगशालामा उपस्थित भएका थिए। जहाँ स्पेनबाट मात्र ३ हजार समर्थक आएका थिए। त्यतिबेला नै आंशिक रुपमा लकडाउन गरिएको स्थिति थियो।
सनडे टाइम्समा प्रकासित समाचार अनुसार ब्रिटेन नेसनल हेल्थ सर्भिसले कोरोनाका कारण मृत्यु भएका मध्ये ४१ जना लिभरपुल र एट्लेटिकोबीचको खेलसँग सम्बन्धित रहेको बताएको हो।
खेलअघि नै स्पेनमा लाखौंको संख्यमा संक्रमण फैलिसकेको र ती मध्ये केहि व्यक्ति लिभरपुल आएको अक्सफोर्ड विश्वविद्यालयले तथ्याङ्क विश्लेषण गरेको छ।
यसअघि लिभरपुल सिटीका मेयरले युरोपियन च्याम्पियन्स लिगको खेलका दौरान कोरोनाभाइरसको संक्रमण फैलिएको हो वा होइन भन्ने विषयमा अनुसन्धान गर्न निर्देशन दिएका थिए।
