अन्तर्राष्ट्रिय फुटबलको सर्वोच्च संस्था फिफाले हाइटीका फुटबल महासंघका अध्यक्षलाई निलम्बन गरेको छ।
फिफाको इथिक्स कमिटीले हाइटी फुटबलका अध्यक्ष युभेस जिन बार्टलाई यौन दुर्व्यवाहरको अभियोग लागेको विषयमा अनुसन्धान गर्न निलम्बन गरेको हो।
कमिटीले फिफाको कोड अफ इथिक्सअन्तर्गत धारा ८४ र ८५ अन्तर्गत निलम्बन गरिएको जनाएको छ।
महिला खेलाडीमाथि यौन दुर्व्यवहारको आरोप लागेका जीनलाई गत मे २५ देखि लागू हुने गरी ९० दिनका लागि निलम्बन गरिएको हो। उनलाई राष्ट्रिय तथा अन्तर्राष्ट्रिय फुटबलमा संलग्न हुन नपाउने गरी निलम्बन गरिएको फिफाले जनाएको छ।
हाइटीको राष्ट्रिय प्रशिक्षण केन्द्रमा उनले महिला खेलाडीलाई यौन दुर्व्यवहार गरेको गत अप्रिल ३० मा सार्वजनिक भएको थियो।
केन्द्रमा रहेकी एक महिलाले युवा महिला खेलाडीहरुलाई अध्यक्ष जिनसँग यौन सम्बन्ध राख्न दबाब दिने गरेको बताइएको छ। पिडीत फुटबलर मध्ये एक जनाले आफूलाई दुर्व्यवहार गरेको सार्वजनिक गरेकी थिइन्।
तर यो अभियोग जिनले अस्विकार गर्दै आएका छन्। जिन सन् २००० देखि हाइटीको फुटबल संघका अध्यक्ष छन्।
