अखिल नेपाल फुटबल संघ (एन्फा) ले ललितपुर जिल्ला फुटबल संघका अध्यक्ष पुरुषोत्तम थापालाई निलम्बन गर्ने निर्णय अनुमोदान गरेको छ।
सोमबार बसेको एन्फा कार्यसमिति बैठकले थापालाई आगामी एन्फा कंग्रेसम्मका लागि गरिएको निलम्बन अनुमोदान गर्दै थप कारबाहीका लागि अनुसाशन समितिमा पठाउने निर्णय गरेको हो।
'अनुशासन सम्बन्धमा छलफल हुँदा ललितपुर जिल्ला फुटबल संघका अध्यक्ष पुरुषोत्तम थापाले यस संघको विधानको विपरीतका गतिविधि गरेको विषयमा २०७७ वैशाख २४ गते सोधिएको स्पष्टिकरणको सम्बन्धमा निजबाट प्राप्त स्पष्टिकरण जवाफ समेतमा एन्फाद्वारा सोधिएको स्पष्टिकरण तर्फ प्रवेश नै नगरी उल्टै एन्फा विधानको धारा १४ को उपधारा १(क) समेतको विपरीत हुने गरी प्राप्त भएको जवाफ चित्त बुझ्दो नभएकोले विधान अनुसार निजलाई संघकोआगामी कंग्रेस (साधारण सभा) बैठक सम्मको लागि अस्थायी निलम्बन गरी कार्वाही गरिएको विषयलाई अनुमोदन गर्दै अन्य आवश्यक थप कार्यको लागि अनुसाशन समितिमा पेश गर्ने निर्णय गरिएको छ,' एन्फाको निर्णयमा भनिएको छ।
थापाले गत वैशाख २२ मा एन्फा दिवसको दिन भाइबर ग्रुपमा आक्रोशित जवाफ दिएका थिए। एन्फा वरिष्ठ उपाध्यक्ष पंकजविक्रम नेम्बाङले ए, बी र सी डिभिजन क्लबहरुको भाइबर ग्रुपमा एन्फा दिवसको शुभकामना दिएकोमा उनले असन्तुष्टि जनाउँदै 'आज एन्फा दिवस होइन। चोरहरूको श्री गणेश डे हो।' भनेका थिए।
एन्फा दिवसमा आफ्नो असन्तुष्टि पोखेका ललितपुरका अध्यक्ष थापालाई एन्फाले वैशाख २४ गते लिखित स्पष्टिकरण पेश गर्न भन्दै पत्र काटेको थियो। थापाले भाइबरमा गरेको टिप्पणी सामाजिक सञ्जालको दुरुपयोग गरेको भन्दै ध्यानाकर्षण भएको पत्रमा उल्लेख छ। एन्फाले थापालाई कानुनविपरितको कार्य गरेको भन्दै ४८ घन्टाभित्र स्पष्टिकरण पेश गर्न भनेको थियो।
थापाले दुई दिनपछि स्पष्टिकरण पेश गरेका थिए। उनले एन्फा दिवसलाई आफूले भावानात्मक रुपमा आफ्नो मान्न नसकिएकोले 'चोरहरुको दिवस' भन्दै बाध्य भएको ब्यहोरा लेखेर स्पष्टिकरण पेश गरेका थिए।
उनले आफूले कसैलाई इङ्गित नगरेको भन्दै माफी समेत मागेका थिए। उनले पत्रमा फिफासँग आबद्ध भएको दिनलाई एन्फा दिवसको रुपमा मनाउन समेत सुझाव दिएका थिए।
तर एन्फाले उनले पठाएको स्पष्टिकरण चित्तबुझ्दो नभएको भन्दै कारबाही गरेको थियो।