विश्व फुटबलको सर्वोच्च निकाय फिफाका अध्यक्ष जियानी इन्फान्टिनोले अमेरिकी नागरिक जर्ज फ्लोयड हत्या प्रकरणमा जर्मनबुन्डेस लिगाका खेलाडीले गरेको विरोधमा साथ दिएका छन्।
काला जातीका फ्लोयड हत्याको विरोध गर्दै बुन्डेसालिगाका चार खेलाडीले मैदानमै विरोध जनाएका थिए। सो विषयमा जर्मन फुटबल एसोसिएसनले अनुन्धान गरिरहेको छ। जर्मन फुटबलले मैदानमा राजनीतिक विषय ल्याएको हो वा होइन भन्ने अनुसन्धान गरिरहेको छ।
अमेरिकाको मिनियापोलिस शहरमा प्रहरीले नियन्त्रणमा लिएपछि ४६ वर्षीय फ्लोयडको गत सोमबार मृत्यु भएको थियो।
फ्लोयड हत्याको विरोधमा बोरुसिया डर्टमुन्डका जाडोन सान्चो र हाकिमी, साल्केका वेस्टन म्याकेन र बोरुसिया मुन्छेनग्लाडबाखका मार्कोस थुरामले विरोध जनाएका थिए।
खेलाडीहरूको विरोधलाई अन्यथा लिन नहुने फिफा अध्यक्ष जियानीको भनाइ छ। साथै उनले खेलाडीलाई सजायको सट्टा साथ दिनु पर्न पनि बताए।
उनले सबैले रंगभेदको विरोध गर्नु पर्ने बताउँदै हिंसाको भने साथ दिन नहुने बताएका छन्।
बुन्डेसलिगामा खेलाडीहरूले गोल गरेपछि सेलिब्रेसन गर्नुको सट्टा विरोध जनाएका थिए।
बोरुसिया डोर्टमुन्डका जाडोन फरवार्ड सान्चोले एससी पार्डाबोनविरुद्ध गोल गरेपछि 'जर्ज फ्लोयडलाई न्याय देउ' लेखेको टी-सर्ट देखाएका थिए। सान्चोसँगै डोर्टमुन्डका अर्का खेलाडी हाकिमीले पनि 'फ्लोयडलाई न्याय देउ' लेखेको टी-सर्ट देखाएर विरोध गरे।
सोन्चो र हाकिमीले विरोध गर्नुअघि अर्को जर्मन क्लब बोरुसिया मुन्छेनग्लाडबाखका मार्कोस थुरामले पनि विरोध जनाएका थिए। उनले गोल गरेपछि घुँडा टेकेर विरोध गरे।
फ्लोयड हत्या प्रकरणमा इंग्लिस प्रिमियर लिग लिडर लिभरपुलका खेलाडीले पनि विरोध गरेका थिए।
अभ्यासका क्रममा २९ खेलाडीले घरेलु मैदानमा घुँडा टेकेर विरोध जनाएका थिए। सोमबारको प्रशिक्षणमा खेलाडीहरूले घुँडा टेकेर तस्बिर खिँच्नका लागि अनुरोध गरेका थिए।
काला जातिका पुरूष फ्लोयडलाई प्रहरी अधिकारीले घाँटीमा घुँडाले थिचेर मारेको भन्दै अहिले विश्वभर विरोध भइरहेको छ। जसमा खेलाडीहरूले व्यापक समर्थन जनाउँदै आएका छन्।
