इंग्लिस प्रिमियर लिगमा चेल्सीले पराजय भोगेको छ। बुधबार राति भएको खेलमा चेल्सीलाई वेस्ट ह्याम युनाइटेडले ३-२ गोलले पराजित गरेको हो।
खेलमा अग्रता भने चेल्सीले लिएको थियो। विलियनले ४२ मिनेटमा पेनाल्टीमा गोल गर्दै चेल्सीलाई अग्रता दिलाए। तर पहिलो हाफको इन्जुरी टाइममा वेस्ट ह्यामका सोउचेकले बराबरी गोल फर्काए।
५१ मिनेटमा एन्टोनियोले अर्को गोल गरेपछि वेस्ट ह्यामले २-१ गोलको अग्रता लियो। ७२ मिनेटमा विलियनले व्यक्तिगत दोस्रो गोल गरेपछि चेल्सीले २-२ को बराबरी गर्न सफल भयो।
तर खेल एक मिनेट बाँकी छदा वेस्ट ह्यामले तेस्रो गोल गर्दै अग्रता लियो। ८९ मिनेटमा यर्मोलेङ्कोले गोल गरेपछि वेस्ट ह्यामले ३-२ को जित हात पारेको हो।
जितसँगै वेस्ट ह्यामको रेलिगेशनबाट बच्ने आसा कायमै राखेको छ। १८औं स्थानको उसको ३२ खेलबाट २७ अंक छ। रेलिगेशन जोनबाट एक स्थान माथि रहेको १७औं स्थानको वाटफोर्डको समान खेलबाट २८ अंक छ।
यता चौथो स्थानको चेल्सीको समान खेलबाट ५४ अंक छ।
लिगको अर्को खेलमा आर्सनलले नर्विच सिटीलाई ४-० गोलले पराजित गरेको छ।
आर्सनलका लागि आउबामेयाङकले ३३ र ६७ मिनेटमा गरी दुई गोल गरे। आर्सनलका लागि जाकाले ३७ मिनेट र सेड्रिक सोएरेसले ८१ मिनेटमा गोल थपे।
जितसँगै आर्सनल ४६ अंक जोडेर सातौं स्थानमा उक्लिएको छ।
यता तेस्रो स्थानको लेस्टरलाई एभर्टनले २-१ ले हराएको छ।
तेस्रो स्थानको लेस्टरको ५५ अंक छ भने एभर्टन ४२ अंक जोडेर ११औं स्थानमा उक्लिएको छ।
