इटालियन सिरि 'ए' को उपाधि होडमा रहेको शीर्ष स्थानको युभेन्ट्स पराजित भएको छ। मंगलबार राति भएको खेलमा युभेन्ट्सलाई एसी मिलानले २ गोलले पछि परेको अवस्थाम उल्टाउँदै ४-२ गोलले पराजित गर्यो।
पहिलो हाफ गोलरहित बराबरीमा सकिएको खेलको दोस्रो हाफको सुरुवातमै युभेन्ट्सले अग्रता लियो। उसका लागि रोबिअटले ४७ मिनेटमा पहिलो गोल गरे। ५३ मिनेटमा क्रिस्टियानो रोनाल्डोले दोस्रो गोल गरेपछि युभेन्ट्स २-० ले अघि बढ्यो।
तर त्यसपछि मिलानले घरेलु मैदानमा भएको खेलमा चार गोल गर्यो।
६२ मिनेटमा इब्राहिमोविकले पेनाल्टीमार्फत पहिलो गोल गरे। केसिइले ६६ मिनेटमा बराबरी गोल फर्काउन सफल भए।
६७ मिनेटमा मिलानले अग्रता लियो। उसका लागि डा लेइओले गोल गरेका थिए। ८० मिनेटमा रेबिकले चौथो गोल गरेपछि मिलान जिततर्फ अघि बढेको थियो।
यता शीर्ष स्थानको युभेन्ट्स पराजित भएको दिन दोस्रो स्थानको लाजियोले पनि हार बेहोरेको छ। लाजियोलाई रेलिगेशनबाट बच्न संर्घषरत लेसीले २-१ ले पराजित गर्यो।
लिगको शीर्ष स्थानको युभेन्ट्सको ३१ खेलबाट ७५ अंक छ। लाजियो ६८ अंक जोडेर दोस्रो स्थानमा छ। एसी मिलान ४९ अंक जोडेर पाँचौ स्थानमा उक्लिएको छ।
