फरवार्ड ज्लाटन इब्राहिमोभिचले इटालियन क्लब एसी मिलानमा आफू अध्यक्ष, प्रशिक्षक र खेलाडीको भूमीकामा रहेको प्रतिक्रिया दिएका छन्।
मंगलबार राति सिरि एको शीर्ष टिम युभेन्ट्सलाई मिलानले ४-२ ले पराजित गरेपछि स्विडिस फरवार्ड इब्राहिमोभिचले यस्तो प्रतिक्रिया दिएका हुन्। खेलमा उनले पेनाल्टीमार्फत एक गोल गरेका थिए।
३८ वर्षीय इब्राहिमोभिचले आफूलाई मिलानले सिजनको सुरुमै भित्र्याएको भए मिलानले सिरि एको उपाधि जित्न सक्ने पनि दाबी गरे।
इब्राहिमोभिच गत जनावरीमा अमेरिकी क्लब एलए ग्यालेक्सी छाडेर मिलान आएका थिए। उनको सम्झौता सिजनको अन्त्यबाट सकिँदैछ।
'म सिजनको सुरुदेखि नै मिलानमा भएको भए हामीले उपाधि जित्न सक्थ्यौं,' उनले भने,'अहिले म क्लबको अध्यक्ष, प्रशिक्षक र खेलाडीको भूमीकामा छु। तर मलाई फुटबलरको रुपमा मात्र तलब दिइएको छ।'
उनले मिलानसँग सम्झौता थप हुने आसा गर्दै सबै कुरा आफ्नो हातमा नभएको बताए।
इब्राहिमोभिच दोस्रो पटक मिलानमा आबद्ध भएका हुन्। यसअघि उनले २०११ देखि २०१२ सम्म मिलानबाट खेलेका थिए। फ्रेन्च क्लब पिएसजीमा आबद्ध हुनुअघि उनले मिलनबाट ८५ खेल खेल्दै ५६ गोल गरेका थिए।