स्पेनिस ला लिगाको उपाधि होडमा रहेको बार्सिलोनाले इस्प्यान्योललाई पराजित गरेको छ। बुधबार राति भएको खेलमा बार्सिलोनाले १-० को जित हात पारेको हो।
बार्सिलोनाका लागि लुइस सुआरेजलले निर्णायक गोल गरे। उनले खेलको ५६ मिनेटमा गोल गरे।
जससँगै उनी बार्सिलोनाका लागि सर्वाधिक गोल गर्ने खेलाडीको तेस्रो स्थानमा उक्लिए। उनले अहिलेसम्म बार्सिलोनाका लागि १९५ गोल गरिसकेका छन्।
सर्वाधिक गोल गर्ने खेलाडीको दोस्रो स्थानमा सेसर रोद्रिगेज (२ सय ३२ गोल) र शीर्ष स्थानमा लिओनल मेसी (६ सय ३० गोल) छन्।
बुधबार बार्सिलोनासँग हारेसँगै इस्प्यान्योल रेलिगेशनमा परेको छ। अंक तालिकाको पुछार २०औं स्थानमा रहेको उसले तीन खेल्न बाँकी छदा २४ अंक मात्र जोड्न सक्यो।
खेलमा दुवै टिमका एक एक खेलाडीले रातो कार्ड पाउँदा दुवै टिम १०-१० खेलाडीमा सीमित भए।
बार्सिलोनाका अन्सु फाटीले ५० मिनेटमा रातो कार्ड पाएका थिए। तीन मिनेटपछि इस्प्यान्योलका लाजानोले पनि रातो कार्ड पाए। दुवैलाई भारमार्फत रातो कार्ड दिइएको थियो।
जितसँगै अंक तालिकाको दोस्रो स्थानमा रहेको बार्सिलोनाले शीर्ष स्थानको रियल म्याड्रिडसँगको अंक दूरी एकमा झारेको छ। बार्सिलोनाले ३५ खेलबाट ७६ अंक जोड्दा एक खेल कम खेलेको रियलले ७७ अंक जोडेको छ।
बार्सिलोनाले उपाधि जित्नका लागि अब रियलले बाँकी रहेका चार मध्ये दुई खेलमा अंक गुमाउनु पर्नेछ भने बार्सिलोनाले बाँकी तीन खेल नै जित्नु पर्नेछ। रियलका लागि भने तीन जित काफी छ।
