रियल म्याड्रिड स्पेनिस ला लिगाको उपाधि जित्नबाट दुई जित टाढा रहेको छ। शुक्रबार राति अलाभेसलाई २-० गोलले पराजित गर्दै रियल ला लिगाको उपाधि नजिक पुगेको हो।
रियल म्याड्रिडको जितमा करिम बेन्जामाले खेलको ११ मिनेटमा पेनाल्टीमार्फत गोल गरे। अलाभेसका जिमो नाभार्रोले फेर्ल्यान्ड मेन्डेलाई फउल गरेपछि रियलले पेनाल्टी पाएको थियो।
पहिलो हाफमा १-० ले अघि रहेको रियलले दोस्रो हाफ सुरु भएको पाँचौ मिनेटमा अग्रता दोब्बर पार्यो। रियलका लागि मार्को एसेन्सियोले ५० मिनेटमा दोस्रो गोल गरे।
जितसँगै अंक तालिकाको शीर्ष स्थानमा रहेको रियलले ३५ खेलबाट ८० अंक जोडेको छ। दोस्रो स्थानको बार्सिलोनाको ७६ अंक रहेको छ।
अब लिगामा तीन चरणका खेल बाँकी छ। तीन मध्ये दुई खेलमा जित हात पारे रियल च्याम्पियन बन्नेछ। बार्सिलोनाले अंक गुमाएको खण्डमा भने रियलका लागि अझ सहज हुनेछ।
यता बार्सिलोनाले उपाधि जित्न भने बाँकी रहेका तीनै खेल जितेर मात्र पुग्दैन रियलले दुई खेलमा अंक गुमाउनु पर्नेछ।
