विश्वकप छनोटका लागि भदौ पहिलो सातादेखि तयारी सुरु गर्न लागिएको नेपाली फुटबल टिमको प्रशिक्षण सुरू नै नभइ स्थगित गरिएको छ।
अखिल नेपाल फुटबल संघ (एन्फा) ले अक्टोबर–नोभेम्बरमा हुने भनिएकाो विश्वकप छनोट प्रतियोगिताका बाँकी खेल २०२१ सम्मका लागि स्थगित भएसँगै नेपाली टिमको प्रशिक्षण पनि स्थगित गरेको हो।
एन्फाले प्रशिक्षणअघि क्वारेन्टिमा बसेका खेलाडी, अफिसियल र प्रशिक्षकलाई रिलिज गरेको पनि जनाएको छ। सबै जनालाई बिहीबार घर पठाइने एन्फाको भनाइ छ।
यसअघि एन्फाले विश्वकप छनोटको तयारी गर्नका लागि ३४ खेलाडीसहित प्रशिक्षक, पदाधिकारी, अफिसियल र होटल स्टाफलाई क्वारेन्टिनमा राखेको थियो। सबै ५४ को कोरोना भाइरसको पिसिआर टेस्ट पनि गरिएको थियो। जसमध्ये बुधबार २५ जनाको नेगेटिभ नतिजा आएको थियो। बाँकीको नतिजा बिहीबार आउने एन्फाले जनाएको छ।
यसअघि छनोट खेलहरू आगामी अक्टोबर ८ र १३ तारिख तथा नोभेम्बर १२ र १७ तारिखमा गराउने भनिएको थियो। तर कोरोनाका कारण अब छनोट खेलहरु २०२१ मा गर्ने फिफाले जनाएको छ।
दोस्रो चरणको छनोटअन्तर्गत नेपालले अब तीन खेल खेल्न बाँकी छ। ती सबै खेल नेपालले घरेलु मैदानमा खेल्ने तय छ।
नेपालले चाइनिज ताइपेई, अस्ट्रेलिया र जोर्डनसँग खेल्नेछ।
समूह ‘बी’ मा रहेको नेपाल पाँच खेलमध्ये एउटामा जित निकाल्दै तीन अङ्क जोडेर चौथो स्थानमा छ। नेपालले चाइनिज ताइपेईलाई हराएको थियो। अन्य चार खेलमा पराजित भएको थियो।
नेपालको समूहमा अस्ट्रेलिया १२ अंकका साथ शीर्ष स्थानमा छ समान १० अंक जोडेको कुवेत र जोर्डन क्रमशः दोस्रो र तेस्रो स्थानमा छन्। कुनै अंक नजोडेको चाइनिज ताइपेई पाँचौं स्थानमा छ।
विश्वव्यापी बनेको कोरोनाका कारण गत चैत ४ गतेबाट एन्फाले सचिवालयसमेत बन्द रहने गरी सम्पूर्ण फुटबल गतिविधि बन्द गरेको थियो। त्यसयता सम्पूर्ण फुटबल गतिविधि स्थगित भएका थिए।