पेरिस सेन्ट जर्मेन (पिएसजी) तथा फ्रान्सका फरवार्ड केलियन एमबाप्पेलाई कोरोना भाइरसको संक्रमण भएको छ।
कोरोना पुष्टि भएसँगै उनले राष्ट्रिय टिम छाडेका छन्।
अब उनले युइएफए नेसन्स लिगअन्तर्गको खेल गुमाउनेछन्। फ्रान्सले मंगलबार पेरिसमा क्रोएसियाविरुद्ध खेल्दा एमबाप्पे अनुपस्थित रहनेछन्।
खेललाई सन् २०१८ को विश्वकपको फाइनलको रिम्याचको रुपमा लिइएको छ।
यसअघि उनले शनिबार स्विडेनविरुद्धको खेलेका थिए। जुन खेलमा उनले विजयी गोल गरेका थिए।
६ दिनअघि फ्रेञ्च लिग वान च्याम्पियन पिएसजीका ब्राजिलियन फरवार्ड नेइमारसहित तीन जना खेलाडीलाई कोरोना भएको थियो।
नेइमारसँगै पिएसजीका एन्जल डि मारिया र लिएन्द्रो पारेडेसलाई पनि कोरोना संक्रमण भएको थियो।
च्याम्पियन्स लिगको फाइनलपछि नेइमार, डि मारिया लगायत पिएसजीका खेलाडी छुट्टी मनाउन गएको थियो।
जसका कारण उनीहरूलाई कोरोना सरेको बताइएको थियो।