फ्रेञ्च लिग वानको सुरुवाती तीन खेल गुमाएका पेरिस सेन्ट जर्मेन (पिएसजी) का फरवार्ड केलियन एमबाप्पे मैदान फर्किएका छन्।
एमबाप्पेले कोरोना भाइरसको संक्रमण हुँदा लिगको सुरुवाती खेल गुमाएका थिए।
आइतबार एमबाप्पे फर्किएको खेलमा पिएसजीले निसलाई ३-० गोलले पराजित गर्यो।
जसमा एमबाप्पेले ३८ मिनेटमा पेनाल्टीबाट पहिलो गोल गरे।
पहिलो हाफको इन्जुरी टाइममा एन्जल डि मारियाले पिएसजीको अग्रता दोब्बर पारे।
६६ मिनेटमा मार्क्युन्होसले अर्को गोल गरेपछि पिएसजी ३-० ले अघि बढेको थियो।
यसअघि मार्सेलीविरुद्धको खेलमा झगडा गरेका कारण प्रतिबन्धमा परेका पिएसजीका फरवार्ड नेइमारसहित लेभिन कुर्जावा र लेइन्द्रो परेडेस खेलमा अनुपस्थित थिए।
मार्सेलीविरुद्धको दोस्रो खेलमा पराजित भएसँगै पिएसजी लगातार दुई खेलमा पराजित भएको थियो। त्यसपछि लगातार दुई खेलमा जित हात पारेको पिएसजीले ६ अंक जोडेको छ भने अंक तालिकाको सातौं स्थानमा छ।