इंग्लिस प्रिमियर लिगअन्तर्गत साविक विजेता लिभरपुलले लगातार दोस्रो खेलमा जित निकाल्ने क्रममा १० खेलाडीमा सीमित चेल्सीलाई पराजित गरेको छ।
लिभरपुलले चेल्सीलाई उसैको मैदानमा २-० गोलले पराजित गरेको हो। लिभरपुलको जितमा दुवै गोल साडियो मानेले गरे।
पहिलो हाफ गोलरहित बराबरीमा सकिएको थियो। तर पहिलो हाफको इन्जुरी टाइममा डिफेन्डर एड्रियास क्रिस्टेनसेनले रातो कार्ड पाउँदा चेल्सीले दोस्रो हाफभर १० खेलाडीमा खेल्नु परेको थियो।
लिभरपुलका मानेमाथि फल गरेका क्रिस्टेनसेनलाई रेफ्रीले सुरुमा पहेँलो कार्ड देखाएका थिए। तर पछि रिभ्यू गर्दै उनलाई रातो कार्ड दिइएको थियो।
दोस्रो हाफमा १० खेलाडीमा सीमित चेल्सीविरुद्ध लिभरपुलले चार मिनेटभित्र दुई गोल गर्यो।
५० मिनेटमा फिर्मिन्होको पासमा मानेले पहिलो गोल गरेका थिए। उनले ५४ मिनेटमा अग्रता दोब्बर पारे।
जितसँगै चौथो स्थानमा रहेको लिभरपुलले २ खेलबाट ६ अंक जोडेको छ। पहिलो खेलमा जित निकालेको चेल्सी २ खेलबाट ३ अंक जोड्दै दशौं स्थानमा छ।
यता लगातार दोस्रो जित निकालेर लिगको शीर्ष स्थानमा उक्लने क्रममा लेस्टर सिटीले वर्नलीलाई ४-२ गोलअन्तरले पराजित गरेको छ।