इंग्लिस प्रिमियर लिगअन्तर्गत वेस्ट ब्रुमविरुद्ध पहिलो हाफमा ३-० पछि परेको चेल्सीले हार टारेको छ।
शनिबार राति भएको खेलमा ३-० ले पछि परेको स्थिति उल्टाएर चेल्सीले वेस्ट ब्रुमविरुद्ध ३-३ गोलको बराबरी खेलेको हो।
वेस्ट ब्रुमका लागि रोबिन्सनले खेलको चौथो र २५ मिनेटमा गरी दुई गोल गरेका थिए। २७ मिनेटमा बार्टलीले अर्को गोल गरेपछि वेस्ट ब्रुम ३-० ले अघि बढेको थियो।
दोस्रो हाफमा सुधारिएको खेल प्रदर्शन गरेको चेल्सीका लागि ५५ मिनेटमा माउन्टले पहिलो गोल गरे।
हुडसन ओडोइले ७० मिनेटमा अर्को गोल गरेपछि चेल्सीले खेलमा फर्कने संकेत देखायो। खेलको इन्जुरी टाइममा अब्राहमले बराबरी गोल गरेपछि चेल्सीले सम्भावित हार टार्यो।
त्यसअघि एभर्टनले क्रिस्टल प्यालेसलाई २-१ र म्यानचेस्टर युनाइटेडले ब्राइटनलाई ३-२ गोलले पराजित गरे। लगातार तीन
जित निकालेको एभर्टन लिगको शीर्ष स्थानमा उक्लिएको छ।
चेल्सीले भने तीन खेलबाट चार अंक जोडेको छ भने अंक तालिकामा छैटौं स्थानमा छ।
