इंग्लिस प्रिमियर लिगमा चेल्सीले सानदार जित हात पारेको छ।
चेल्सीले शनिबार भएको खेलमा क्रिस्टल प्यालेसमाथि ४-० गोलको जित निकालेको हो।
पहिलो हाफ गोलरहित बराबरीमा सकिएको खेलमा चेल्सीले दोस्रो हाफमा चार गोल गर्न सफल भयो।
चेल्सीका लागि यसै सिजन क्लबमा भित्रिएका बेन चिलवेलले ५० मिनेटमा पहिलो गोल गरे।
६६ मिनेटमा चेल्सीले अग्रता दोब्बर पार्यो। चेल्सीका लागि पहिलो गोल गरेका चिलवेलको पासमा जोउमाले दोस्रो गोल गरे।
बाँकी दुई गोल चेल्सीले पेनाल्टीबाट गर्यो। दुवै पेनाल्टी जोर्गिन्होले प्रहार गरेका थिए। उनले ७८ र ८२ मिनेटमा पेनाल्टीमार्फत गोल गरेका हुन्।
चेल्सीले सुरुवाती तीन खेलबाट चार अंक मात्र जोड्न सकेको थियो।
चौथो खेलमा जित हात पारेसँगै ७ अंक जोडेको चेल्सी अंक तालिकाको चौथो स्थानमा उक्लिएको छ।