इंग्लिस क्लब म्यानचेस्टर युनाइटेडले फ्रेञ्च क्लब पिएसजीका पूर्व स्ट्राइकर एडिन्सन काभानीसँग सम्झौता गरेको छ।
३३ वर्षीय उरुग्वेका स्ट्राइकरसँग युनाइटेडले फ्री ट्रान्सफरमा सम्झौता गरेको हो। गत जुनमा सम्झौता सकिएपछि उनले पिएसजी छाडेका थिए।
म्यानचेस्टरमा काभानीले अहिले एक वर्षको सम्झौता गरेका छन्।
काभानीले पिएसजीका लागि कुल ३०१ खेल खेल्दा २ सय गोल गरेका थिए। उनी सन् २०१३ मा इटालिय क्लब नापोलीबाट पिएसजमा आबद्ध भएका थिए।
उरुग्वेका लागि काभानीले ११६ खेल खेल्दा ५० अन्तर्राष्ट्रिय गोल गरेका छन्।
युनाइटेडमा आबद्ध भएका काभानीले यहि महिना आफ्नो पूर्व क्लबसँग खेल्ने सम्भावना छ। युरोपियन च्याम्पियन्स लिगमा युनाइटेड र पिएसजी एकै समूहमा छन्।
सिजनको लिगमा संघर्ष गरिरहेको युनाइटेडले २० अक्टोबरमा पिएसजीसँग च्याम्पियन्स लिग खेल्नुअघि १७ अक्टोबरमा न्युकालससँग लिगमा प्रतिस्पर्धा गर्नेछ।
लिगमा युनाइटेड १६औं स्थानमा छ। आइतबार युनाइटेडलाई टोटेनहमले ६-१ गोलले पराजित गरेको थियो।
म्यानचेस्टर युनाइटेड विश्वकपको उत्कृष्ट क्लब भएको बताउँदै काभानीले म्यानचेस्टरमा आबद्ध हुनु पाउनु गर्वको कुरा भएको बताएका छन्।
