भारतको आइ-लिग दोस्रो डिभिजनको फाइनल चरणमा नेपाली राष्ट्रिय टिमका फरवार्ड अभिषेक रिजाल आबद्ध मोहमेडन एससीले लगातार दोस्रो खेलम जित हात पारेको छ।
मोहमेडनले आइतबार भएको खेलमा अर्का नेपाली फरवार्ड राजेश परियार आबद्ध अरा एफसीलाई ४-१ गोल अन्तरले पराजित गर्यो। राजेशले भने खेल्ने मौका पाएनन्।
मोहमेडनको जितमा फरवार्ड अभिषेकले दुई गोल गरे।
मोहमेडनले खेलको १३ मिनेटमा प्लाजाको गोलबाट अग्रता लियो। २१ मिनेटमा अभिषेलके मोहमेडनको अग्रता दोब्बर पारे। उनले डिबक्स भित्रबाट गोल गरेका थिए।
अघिल्लो खेलमा अन्तिम पाँच मिनेटमा मात्र मौका पाएका अभिषेकलाई मोहमेडनले आइतबार भने पहिलो रोजाइमै खेलाएको थियो।
४५ मिनेटमा अभिषेकले व्यक्तिगत दोस्रो तथा टिमका लागि तेस्रो गोल गर्न सफल भए।
पहिलो हाफमा ३-० गोलले पछि परेको अराका लागि ५३ मिनेटमा साइफुलले गोल गर्न सफल भए।
७७ मिनेटमा मोहमेडनले अर्को गोल गर्दै अग्रता ४-१ मा पुर्यायो। फइजले मोहमेडनका लागि चौथो गोल गरेका थिए।
लगातार दुई जित निकालेको मोहमेडन ६ अंकसहित अंक तालिकाको शीर्ष स्थानमा छ।
कोरोना भाइरसका कारण प्रतियोगिताको अन्तिम चरण हुन सकेको थिएन। बिहीबार प्रतिस्पर्धा सुरु भएसँगै भारतमा पनि कोरोना भाइरसपछि औपचारिक रूपमा फुटबल फर्किएको थियो।
गत जनावरीमा सुरु भएको प्रतियोगिताको समूह चरणका खेल बाँकी रहदा स्थगित गरिएको थियो।
अन्तिम चरणमा अरा एफसी, भवानीपुर क्लब, बेंगलुरु युनाइटेड, गढवाल एफसी र मोहमेडन एससीबीच प्रतिस्पर्धा भइरहेको छ।
राउन्ड रोबिनको आधारमा पाँच टिमबीच हुने प्रतिस्पर्धा ११ दिन चल्नेछ। च्याम्पियन बन्ने टिम आइ लिग २०२०-२१ का लागि छनोट हुनेछ।
