युइएफए नेसन्स लिगमा इटाली र नेदरल्यान्ड्सले बराबरी खेल्दै अंक बाडेका छन्। बुधबार इटालीमा भएको समूहमा ए-१ को खेल १-१ गोलको बराबरीमा सकिएको हो।
खेलको १६ मिनेटमा पेलेग्रिनीको गोलबाट इटालीले अग्रता लिएको थियो। उनलाई गोल गर्न बेरेलाले पास उपलब्ध गराएका थिए।
२५ मिनेटमा नेदरल्यान्ड्सले बराबरी गोल फर्कायो। नेदरल्यान्ड्सका लागि भान डे बीकले बराबरी गोल फर्काए।
यहि समूहको अर्को खेलमा पोल्यान्डले बोस्निया एन्ड हर्जगोभिनालाई ३-० गोलले पराजित गरेको छ।
बोस्निया खेलको १४ मिनेटमै १० खेलाडीमा सीमित बनेको थियो। उसका अहमेदोडचिकले रातो कार्ड पाउँदै मैदान छाडेका थिए।
पोल्यान्डका लागि रोबर्ट लेवान्डोस्कीले खेलको ४० मिनेटमा पहिलो गोल गरे।
४५ मिनेटमा लिनेटीले पोल्यान्डको अग्रता दोब्बर पारे। उनलाई गोल गर्न लेवान्डोस्कीले नै पास उपलब्ध गराएका थिए।
५२ मिनेटमा लेवान्डोस्कीले टिमका लागि तेस्रो गोल गरे।
जितसँगै पोल्यान्ड समूहमा ७ अंक जोडेर शीर्ष स्थानमा उक्लिएको छ। दोस्रो स्थानको इटालीको ६ अंक छ भने ५ अंक जोड्दै नेदरल्यान्ड्स तेस्रो स्थानमा छ। पुछारको बोस्नियाले २ अंक जोडेको छ।
