बंगलादेशविरुद्ध हुने दुई वटा अन्तर्राष्ट्रिय मैत्रीपूर्ण फुटबल खेलका नेपाली राष्ट्रिय फुटबल टिमले बिहीबारदेखि दशरथ रंगशालामा अभ्यास थालेको छ।
बंगलादेशको राजधानी ढाकास्थित बंगबन्धु राष्ट्रिय रंगशालामा आगामी नोभेम्बर १३ र १७ (कात्तिक २८ र मंसिर २) मा अन्तर्राष्ट्रिय मैत्रीपूर्ण खेल हुँदैछ।
मैत्रीपूर्ण खेलका लागि नेपाली टिमको प्रशिक्षण बालगोपाल महर्जनले सम्हाल्नेछन्। महर्जनले गत मंसिरमा नेपालको यु२३ टिमलाई दक्षिण एसियाली खेलकुदमा स्वर्ण दिलाएका थिए।
नियमित प्रशिक्षक योहान कालिन स्विडेनबाट नेपाल आउन नसक्ने भएपछि उनको स्थानमा महर्जनलाई जिम्मेवारी दिइएको हो।
नेपाल र बंगलादेशबीच दुई साताअघि नै मैत्रीपूर्ण खेल हुने टुंगो लागेको थियो। तर नेपालले भने दशैं बिदापछि मात्र अभ्यास सुरु गरेको हो।
बंगलादेशले भने अघिल्लो सातादेखि नै अभ्यास सुरु गरिसकेको छ।
नेपालले बंगलादेशविरुद्धको खेलका लागि ३३ जना खेलाडीलाई अभ्यासमा बोलाएको छ।
कोरोना महामारीका कारण रंगशालामा हुने अभ्यासको रिपोर्टिङका लागि मिडियालाई निषेध गरिएको छ।
अभ्यासमा बोलाइएका खेलाडी
अभिषेक रिजाल, विशाल श्रेष्ठ, देवेन्द्र तामाङ, सुजल श्रेष्ठ, विशाल राई, रञ्जित धिमाल, विकेश कुथु, सुमन अर्याल, नवयुग श्रेष्ठ, सेसेहाङ आङ्देम्बे, जर्जप्रिन्स कार्की, विकास खवास, सरोज दाहाल, अमित तामाङ, सुवास गुरुङ, तेज तामाङ, अजित भण्डारी, रवि पासवान, सुनील बल, छिरिङ गुरुङ, आसिस लामा, अनन्त तामाङ, विक्रम लामा, मिक्छेन तामाङ, दिलेन लोक्तन, अञ्जन विष्ट, पुजन उपरकोटी, विमल राना, दीप कार्की, अरिक विष्ट, दर्शन गुरुङ, रोहित चन्द, किरण लिम्बु।
